LUFTA PER PD- Një betejë amorfe, pa tru dhe ide

Nga Bedri Islami

Një betejë amorfe, pa tru dhe pa ide ajo e 8 janarit. Shkopinj, varetë që përplaseshin në dyert e blinduara, harapashë të zinj që dilnin nga dritaret e katit të dytë dhe godisnin profesionalisht demonstrues – miq të deri djeshëm; britma, ngjitje në shkallë, përsëri përplasje, thirrje delirante, njerëz të çartur, salla mbledhjesh në katin e dytë, ku shefi de jure kishte thirrur edhe gra shtatzëna si mburojë, gaz i bardhë që dilte nga vrimat, pastaj përsëri demonstrues të çartur, që godisnin me aq afsh e urrejtje, e në fund, deklaratat cinike të shefave të dyanshëm: “ fituam!”.

Kundër kujt fituat, o të mjerë!

Ajo që ndodhi në oborrin e selisë së opozitës dhe brenda saj nuk ishte asgjë tjetër veçse përshfaqja e natyrshme e deformimit real të Partisë Demokratike. Prej kohe është thënë se Partia Demokratike nuk është e reformuar, por e deformuar. 8 janari e saktësoi këtë.

Asgjë vizionare, ideore apo progresive, dy kahët e opozitës së njëjtë u shfaqën të egërsuara, të çartura, ku njëra sulmonte një seli të grabitur dhe tjetra e mbronte atë; ku njëra palë sumonte si jeniçerët dhe tjetra mbrohej si akapashët; e thërrasin edhe “Shtëpia e Lirisë”!

Si mund të jetë shtëpi e lirisë një godinë e betonuar nga brenda, e bunkerizuar, me një mijë brava dhe shula, me hekur dhe gaz zjarrfikës; si mund të mësyhet një godinë ashtu, si talebanët e çartallosur; të shkatërrohet gjithçka, vetëm se njëri thotë “kjo tryezë është e imja” e tjetri e kërkon për vete!

Deformimi i opozitës nuk është risi e tanishme, ka filluar prej kohësh, por, gjendja e tashme është katastrofë deri ku nuk thuhet. Reformimi i opozitës nuk mund të vijë nga mendjet e gjymtuara, e jo se jo nga sulmuesit e kalasë, që kanë qenë faktorët kryesorë fashistizimit të saj.

Mendjet e pakta që në prag të 8 janarit bënë thirrje për mendim dhe jo dhunë nuk ishin të përshtatshme për asnjërën palë dhe askush nuk e dëgjoi mendimin e tyre.

Autokracia në opozitë është fatkeqësia e saj. Shumicës qeverisëse edhe mund t’i lejohet për një çast drejtimi autokrat, çka ndodh me qeverisjen Rama, por, për opozitën kjo është vetëvrasje politike. Autokracia në PS është e njohur, por socialistët e pranojnë këtë për deri sa i mban 12 vite në pushtet dhe dihet sa i ëmbël është pushteti.

Në 8 janar u zhvillua lufta për Njëshin. Berisha e di se Njëshi i tij do të thotë mbrojtje nga e ardhmja, që nuk e di se si do të jetë dhe ka zëra se institucione ndërkombëtare, të lodhura nga ai, kërkojnë arrestimin e tij.

Basha e di se Njëshi i tij do të thotë më shumë privilegje, pasurim të mëtejshëm, vendosje gjobash, krijim tarafesh, luftë dhe përfitim nga oligarkët.

Ajo pjesë që mbështet opozitën, ka ardhur në një kohë që, ose duhet të ndryshojë konceptin e Njëshit, sidomos në opozitë, ose të harrojë se mund të vijë ndonjëherë në pushtet.

Xheku i parë i Anglisë, njeri i kulturuar, që ishte më tepër intelektual se sa inteligjent, vishte petka me thurje metalike për t’u mbrojtur nga thikat, që nuk i ndeshi kurrë. Kjo reminishencë më solli ndër mend rrethin që Basha i bëri selisë së tij dhe mënyrën se si e kishte përgatitur mbrojtjen.

Disa gjëra janë ditur që më parë se të do të ndodhnin, disa të tjera përbëjnë shkaqe për studime patologjike.

Është ditur se Berisha do të grumbullojë militantët dhe mitingashët e tij për të marrë me sulm apo me dhunë selinë e opozitës. Ai e mendon ende si pronën e tij private, meqenëse ai ua ka falur demokratëve pasi humbi zgjedhjet e qershorit 2013.

Është ditur se do të sulmohet nga të gjithë anët dhe se mitingashët do të jenë turma e skalitur për një gjë të tillë. Dihej se Berisha do i shkallmonte dyert, sido të ishin, por nuk dihej se pas dyerve do të qëllohej me gaz, qoftë edhe jo lotsjellës.

Është ditur se Berisha do të jetë në qendër të protestës dhe të dhunës, se ai është organizatori, por nuk e di ende dhe nuk arrij ta kuptoj përse Policia e Shtetit nuk e thërret atë të parin. Pamjet filmike janë të qarta.

Sa për Bashën, ai mund të mbrohet edhe nga gjysma e Gardës së Republikës, por nuk mund të jetë lideri i duhur për ata që ai do që ta besojnë. Mënyra se si veproi është ajo që mund të ndodhë nesër nëse vjen në pushtet. Është fytyra e hapur e saj.

8 janari na tregoi një opozitë që mund të jetë mizore nëse qeveris. Ato pamje, edhe sikur të jesh dashamiri më i madh i saj, nuk të shqiten. Kur nuk është e aftë të kuptohet brenda vetes, si mund të jetë e arseshme jashtë vetes?

Berisha është në fundin e tij politik, Basha, sado që të mbahet tani nga sistemi, do vijë një moment që duhet të votohet. Nga kush?