Macron i prerë për mandatin e tij si president: Do ta çoj deri në fund

“Mandati që më është besuar nga populli francez do të shërbehet deri në fund”, tha presidenti francez gjatë një konference për shtyp në Toulon, në jug të Francës, së bashku me kancelarin gjerman Friedrich Merz.

Duke refuzuar të luante “trillime politike” rreth mundësisë së një tjetër shpërbërjeje të Asamblesë Kombëtare Franceze, pas një humbjeje të mundshme në votëbesim, Emmanuel Macron vlerësoi se kryeministri i tij po përballet me një “sfidë që nuk është e pakapërcyeshme” dhe u bëri thirrje forcave politike të gjejnë “shtigje marrëveshjeje” për buxhetin.

François Bayrou, njoftoi të hënën se do të merrte përsipër para ligjvënësve francezë përgjegjësinë e qeverisë së tij, e cila vjen nga një koalicion midis qendrës dhe të djathtës, për uljen e borxhit të Francës dhe arritjen e objektivit fiskal për vitin 2026.

Ky vendim filloi një periudhë të re pasigurie politike për vendin, me Emmanuel Macron në ballë. Meqenëse Bayrou nuk ka shumicën dhe opozita e krahut të majtë dhe e ekstremit të djathtë e ka bërë të ditur se nuk do të japë votëbesim, qeveria ka të gjitha shanset për t’u shembur.

Partitë e Francës së Pabindur (e majta radikale) dhe Tubimi Kombëtar (e djathta ekstreme) kanë kërkuar dorëheqjen e presidentit francez, duke hapur rrugën për zgjedhje të reja për vendin presidencial, një skenar që disa e preferojnë më shumë sesa atë të shpërbërjes së parlamentit dhe mbajtjes së zgjedhjeve të reja parlamentare.