Macron “shpreson të ketë bindur” Trump-in që të kursejë BE-në nga tarifat doganore

“Shpresoj se e kam bindur”: Presidenti francez Emmanuel Macron, duke vizituar Washington-in të hënën mbrojti kauzën e Bashkimit Evropian përballë valës së tarifave të reja doganore të premtuara nga Donald Trump.

Që nga fillimi i mandatit të tij të dytë më 20 janar, presidenti amerikan ka shpallur rregullisht taksa të reja për produktet që hyjnë në Shtetet e Bashkuara, ndonjëherë tashmë në fuqi (me Kinën), ndonjëherë të shtyra për një datë të mëvonshme për kanadezët, meksikanët apo edhe produkte specifike si çeliku, alumini, më vonë barnat, automjetet, etj.

Donald Trump kritikon veçanërisht nivelin e taksës së vlerës së shtuar (TVSH), që paguajnë konsumatorët në vendet evropiane, të cilën ai e krahasoi me një tarifë shtesë doganore për produktet amerikane.

Gjatë një vizite në Shtëpinë e Bardhë të hënën, Emmanuel Macron u përpoq të zbuste disponimin e homologut të tij ndaj bllokut evropian.

“Dëshira jonë është që të ketë konkurrencë të ndershme, të barabartë midis industrive tona, më shumë tregti të rrjedhshme dhe akoma më shumë investime në të dyja anët e Atlantikut”, deklaroi ai gjatë një konference të përbashkët për shtyp në Shtëpinë e Bardhë.

Diskutimet do të vazhdojnë “midis ministrave tanë, ekipeve tona, për të sqaruar temat që duhen sqaruar” në nivel tregtar, shtoi ai.

“Shpresoj ta kem bindur atë”, pohoi më pas presidenti francez, në një intervistë për kanalin amerikan Fox News.

“TVSH-ja nuk është një taksë doganore”, theksoi ai veçanërisht.

“Nuk është realisht koha për të rritur tarifat doganore”, vazhdoi ai. “Pse? Sepse gjëja urgjente është të rrisim shpenzimet tona për mbrojtjen dhe sigurinë. Si prisni që ta bëjmë këtë nëse jemi në një luftë tregtare?”

Një pjesë e madhe e takimit mes Donald Trump dhe Emmanuel Macron u fokusua në luftën në Ukrainë, tre vjet pas fillimit të pushtimit rus.

Emmanuel Macron deklaroi gjithashtu në Fox News se ai i tha homologut të tij se ky i fundit “nuk mund të zhvillojë një luftë tregtare kundër Kinës dhe Evropës në të njëjtën kohë”.

Të hënën në Washington u zhvillua edhe një takim dypalësh mes ministrave të financave, amerikanit Scott Bessent dhe francezit Eric Lombard.

Me këtë rast, Scott Bessent “nënvizoi rëndësinë e vazhdimit të marrëdhënieve të gjata transatlantike midis Francës dhe Shteteve të Bashkuara”, sipas një njoftimi për shtyp nga administrata amerikane.

Kërcënimi i tarifave është edhe më i prekshëm për fqinjët e drejtpërdrejtë të Shteteve të Bashkuara: Kanadanë dhe Meksikën.

Gjatë një konference për shtyp me Emmanuel Macron, Presidenti Donald Trump pohoi se detyrimet doganore që ai dëshiron t’u vendosë atyre do të zbatohen “sipas kohës së planifikuar”.