Mbylle gojën/ Cramon përplaset me Brnabic

Eurodeputetja dhe raportuesja për Kosovën në Parlamentin Evropian, Viola von Cramon, i është kundërpërgjigjur kryeministres serbe Ana Brnabiq, pasi kjo e fundit ofendoi eurodeputeten duke i thënë “duhet të turpërohet”, pasi Cramon tha se bojkotimi i zgjedhjeve në veri të Kosovës është në kundërshtim me standardet demokratike.

Cramon, duke komentuar postimet në Twitter, deklaroi se nëse kryeministrja serbe flet në mënyrë të pacivilizuar, nuk të krijohet përshtypja se ajo është dikush që ka interes bashkëpunimi me përfaqësues të Parlamentit Evropian dhe se kjo mund të jetë shenjë se Serbia nuk është e interesuar për perspektivën evropiane.

“Komunikimi i Anna Brnabiqit në Twitter flet vetë, nuk kam nevojë ta komentoj”, deklaroi Von Cramon duke shtuar:

“Nëse kryeministrja flet me një retorikë të tillë, me sulme të tilla, sillet në mënyrë të pacivilizuar ndaj deputetëve të Parlamentit Evropian – kjo flet shumë, por nuk të krijohet përshtypja se është dikush interesi i të cilit është bashkëpunimi me ne në PE. Nuk mund ta kuptoj se çfarë lloj strategjie madhështore fshihet pas saj – a ka vullnet në Serbi për të vazhduar integrimin, për të parë perspektivën evropiane, apo është qëllimi për t’u përplasur dhe për të qenë arrogantë”, tha Von Cramon