‘Më pak shkopinj, më shumë karota’ për Kosovën

Daniel Serwer, profesor veteran dhe njohës i mirë i Ballkanit Perëndimor, ka shkruar një opinion, të titulluar “Më pak shkopinj, më shumë karrota”. Në këtë shkrim, Serwer ka komentuar situatën e fundit në veri të Kosovës dhe marrëdhënien e trazuar të Qeverisë Kurti dhe ShBA-së e BE-së.

Ai ka përshkruar situatën aktuale, duke theksuar se Kosova është një shoqe e sinqertë e Perendimit por dhe ka këshilluar Albin Kurtin, në lidhje me Asociacionin e komunave me shumicë serbe. Sipas tij, Kuryeministri duhet t’u tregojë serbëve në veri se çka fitojnë me bashkëpunimin me autoritetet e Kosovës.

Në shkrimin e tij, profesori amerikan është kritik edhe ndaj qasjes së bashkësisë ndërkombëtare perëndimore karshi Serbisë. Megjithatë, ai  thekson se “Prishtina nuk ka mundësi të kthehet nga Rusia apo Kina. Kryeministri Kurti ka refuzuar kërkesat e BE-së dhe SHBA-së, të cilat ai beson se do të kufizojnë sovranitetin e vendit dhe do të kërcënojnë integritetin e tij territorial. Por ai ka nevojë për mbështetjen perëndimore që Kosova të mbijetojë dhe të lulëzojë.” – shkruan Serwer.