Mediu dhe Lapaj në tryezën e ‘Ligjeve’, zbardhen propozimet e tyre për ‘Zgjedhoren’

Fatmir Mediu dhe Adriatik Lapaj, kanë marrë pjesë ditën e sotme në Komisionin e Ligjeve ku po diskutohet për Reformën Zgjedhore. Mediu dhe Lapaj, në diskutimet për Reformën Zgjedhore, kanë propozuar që partive t’iu lihet opsionale nëse do duan që ta mbyllin 1/3 e listës për deputetë.

Mediu: Nëse do ta lërë listën tërësisht të hapur ta lërë të hapur. Në kushtetutë thuhet jo më pak se 1/3, është çështje e vullnetit të partisë. Mendoj që alternativa e lënies së hapur të kësaj mundësie, duke marrë parasysh edhe ato faktorë që u thanë për gjeneralët dhe ushtarët. Partitë që duan ta mbyllin listën për ata, dhe pastaj të lënë mundësi për të rinjtë që vijnë e konkurrojnë. Se kanë besimin e qytetarëve që u japin votën. Nëse flasim për demokraci përfaqësuese ne përfaqësojmë jo thjesht partitë, por vullnetin e qytetarëve. Të paktën të jete e mundshme, të lihet fakultative për çdo subjekt politik, kush do ta ketë të hapur ta ketë të hapur.

Lapaj: Ju mund ta lini opsionale, pra meqë kushtetuta e parashikon 2/3 e hapur. Ta lini në dorë të partisë, pra të jetë partia që zgjedh nëse do ta mbyllë një të tretën, pra që të fusni në lista të sigurta njerëz teknikë por nuk marrin shumë vota, dhe të lini opsion për partitë e tjera që nëse duan t’i lënë 100% të hapura, kjo adreson të gjitha shpresat e shoqërisë.