Milivojeviç për deklaratën e Bistronit: Është e rëndësishme që pikëpamjet e Serbisë të rezonojnë

“Ish-diplomati serb, Zoran Milivojeviç beson se deklarata e kryetarit të komisionit për politikë të jashtme të grupit parlamentar të Alternativës për Gjermaninë në Bundestag, Petr Bistron, se Kosova është një dështim i plotë, tregon se pikëpamjet serbe rezonojnë dhe se rrethi i strukturave politike që kanë të njëjtin mendim po rritet, edhe në vendet që janë aq shumë  të rëndësishme në Evropë dhe të cilat marrin pjesë në dialog” – Kështu shkruan media serbe ‘Novosti.’

Milivojeviç, duke komentuar deklaratën e Briston, theksoi se qëndrimi i partisë “Alternativa për Gjermaninë”, e cila është bërë faktor i rëndësishëm në skenën e brendshme politike të Gjermanisë, nuk do të thotë se Berlini do të ndryshojë mendimin e tij për çështjen e Kosovës, por se është e rëndësishme që qytetarët që e përkrahin atë parti të jenë të informuar për situatën në Kosovë.

“Kjo nuk do të thotë se do të ndryshojë qëndrimi, por është e rëndësishme që një popullatë e konsiderueshme në atë vend, e cila e përkrah këtë strukturë politike, të konsiderojë se Kosova është një projekt i dështuar, që paraqet rrezik dhe shqetësim për Evropën. Është domethënëse që është parti parlamentare dhe nëse do të kenë një rezultat të mirë në zgjedhjet e ardhshme, politika e tyre do të kishte ndikim më të madh” –  tha Milivojeviç, I cili gjithashtu theksoi se ky nuk është rast i izoluar në Evropë, se shembuj të tillë ka edhe në Francë, sepse është e qartë se e djathta po forcohet. Nga ana tjetër, sqaroi ai, qëndrime të tilla e mbështesin Serbinë dhe negociatorët që të këmbëngulin në argumentet e tyre.

Në fillim të vitit, deputetët e AfD-së depozituan një kërkesë në Bundestag duke kërkuar nga Berlini tërheqjen e njohjes së Kosovës, me argumentin se “qeveria në Kosovë udhëhiqet nga partia nacionaliste Vetëvendosje e kryeministrit Albin Kurti, e cila në programin e saj parashikon krijimi i një “Shqipërie të madhe”.

Bistron tha se sondazhet aktuale tregojnë se partia e tij është e dyta në Gjermani, ndërsa sondazhet lidhur me zgjedhjet e Parlamentit Evropian thonë se AfD-ja është forca politike më e fortë.