Modelja shqiptare Dajana Kalo përballet me një betejë të rëndë për jetën

Dafina Zeqiri ka ndarë me ndjekësit e saj një apel të fuqishëm human, duke sjellë në vëmendje gjendjen e rëndë shëndetësore të mikeshës së saj, modeles Dajana Kalo, e cila po përballet me një situatë kritike për jetën.

Në një postim emocional në rrjete sociale, këngëtarja ka publikuar një foto nga një moment i lumtur mes tyre, duke shkruar se “kjo foto mban shumë dritë, ashtu siç është në të vërtetë Dajana”. Por pas këtij imazhi plot energji fshihet një realitet i dhimbshëm. Modelja ka pësuar një hemorragji cerebrale si pasojë e një malformacioni arteriovenoz (MAV), një gjendje serioze që ka ndryshuar rrënjësisht jetën e saj.

Si pasojë e hemorragjisë në tru, Dajana aktualisht nuk është në gjendje të lëvizë dorën dhe këmbën e djathtë dhe ka nevojë për kujdes mjekësor të specializuar dhe trajtim të menjëhershëm. Në ditët në vijim, ajo pritet t’i nënshtrohet një operacioni urgjent dhe shumë delikat në tru.
Pas ndërhyrjes, modelen e pret një proces i gjatë dhe i vështirë rikuperimi, që përfshin rehabilitim intensiv, terapi fizike dhe trajtime neurologjike të vazhdueshme. Kostot e larta të operacionit dhe trajtimit pasues kanë bërë që të hapet një faqe GoFundMe, me qëllim mbështetjen financiare të Dajanës dhe familjes së saj në këtë moment kritik.
Dafina Zeqiri u ka bërë thirrje të gjithë ndjekësve të saj për solidaritet, duke theksuar se çdo ndihmë, sado e vogël, mund të bëjë një ndryshim real. “Jeta ndonjëherë na sfidon papritur,” shkruan ajo, duke shtuar se sot ky shpirt i bukur ka nevojë për mbështetjen e të gjithëve.
Apeli i artistes ka marrë reagime të shumta mbështetëse, ndërsa figura publike dhe fansa kanë nisur të bashkohen rreth kauzës, duke dëshmuar se solidariteti mbetet forca më e madhe në momente të tilla.