Musk dyshohet se ka marrë sasi të mëdha droge ndërsa këshillonte Trump

Elon Musk mori sasi të mëdha droge ndërsa shërbente si një nga këshilltarët më të ngushtë të Donald Trump, duke marrë ketaminë aq shpesh sa shkaktoi probleme me fshikëzën.

Kështu zbuloi në artikullin e saj investigues, gazeta amerikane New York Times.

Njeriu më i pasur në botë konsumonte rregullisht ketaminë, ekstazi dhe kërpudha psikedelike, thanë për NYT-në burime anonime të njohura me aktivitetet e tij.

Përdorimi i tij i drogës thuhet se u intensifikua ndërsa ai dhuroi 275 milionë dollarë për fushatën presidenciale të Trump dhe më vonë ushtroi pushtet të konsiderueshëm përmes rolit të tij në krye të “departamentit të efikasitetit qeveritar”, ose Doge.

Musk njoftoi largimin e tij nga shërbimi qeveritar të mërkurën në mbrëmje, muaj pasi shfaqi sjellje të çrregullta duke përfshirë fyerjen e anëtarëve të kabinetit dhe duke bërë një përshëndetje naziste në një tubim politik.

Ekstazia klasifikohet nga Administrata e Zbatimit të Ligjit për Drogat (DEA) si një substancë e kontrolluar e Listës I pa përdorim të pranuar mjekësor, duke e bërë atë tërësisht të ndaluar për punonjësit federalë – megjithëse Musk është klasifikuar si një “punonjës i posaçëm qeveritar”.

Ndërsa ketamina mund të përshkruhet ligjërisht si një substancë e Listës III, përdorimi rekreativ ose përzierja e saj me droga të tjera ndoshta do të shkelte politikat federale të vendit të punës.

Udhëheqësi i Doge zhvilloi atë që ato burime e përshkruanin për New York Times si një zakon serioz të ketaminës, duke konsumuar anestetikun e fuqishëm ndonjëherë çdo ditë në vend të “sasisë së vogël” të marrë “rreth një herë në dy javë” që ai pretendonte në intervista.

Megjithatë, deri në pranverën e vitit të kaluar, Times raporton se Musk po u thoshte bashkëpunëtorëve se përdorimi i ketaminës po i ndikonte në fshikëzën e urinës – një pasojë e njohur e abuzimit kronik të drogës, e cila ka veti psikedelike dhe mund të shkaktojë shkëputje nga realiteti, sipas DEA-s.