NASA ndryshon drejtimin e asteroidit gjigand

Mund të duket si një film fantastiko-shkencor, por gjithçka është e vërtetë. Bëhet fjalë për një eksperiment spektakolar të NASA-s për të shpëtuar Tokën nga përplasja me asteroidët.

Testi i planifikuar për të hënën, më 26 shtator, parashikon që një anije kozmike e NASA-s të detyroi asteroidin Dimorphos të ndryshojë trajektoren, teksa është duke lëvizur me shpejtësi 14,000 milje në orë. Për planetin tonë nuk ka rrezik dhe gjithçka do jetë nën kontroll.

Tom Statler, shkencëtar i NASA-s shpjegon se “Eksperimenti i parë ka të bëjë me aftësinë tonë për të ndërtuar një anije kozmike vetë-drejtuese për të realizuar ndikimin kinetic që pritet të ndodhë. Testi i dytë do të jetë se si asteroidi do ti përgjigjet këtij ndikimi. Një pyetje tjetër është nëse kjo teknikë e ndikimit kinetik mund të përdoret në të ardhmen, nëse ndonjëherë do të jetë e nevojshme.”

Eksperimenti do të kushtojë rreth 330 milionë dollarë dhe do të mbledhë miliona informacione.

Aktualisht, sipas shkencëtarëve, planeti ynë nuk është në rrezik, në praktikë nuk ka asnjë asteroid që mund të bjerë direkt në Tokë. Por ka rreth 27,000 të tillë që gravitojnë pranë planetit tonë.