Ndërroi jetë pasi mori mjekim për dhëmballën

KOLONJË – Prindërit e të riut GENTJAN ISAI që humbi jetën pasi mori mjekim për dhimbjen e dhëmballës kanë treguar se si u përkeqësua shëndeti i 35-vjeçarit pasi u kthye në shtëpi. Ai kishte shfaqur shqetësim dhe ishte ënjtur ndaj prindërit i kishin sugjeruar që të shkonte në Ersekë tek dentisti, i cili i kishte dhënë ilaçet. Nëna rrëfen se sapo mbërriti në shtëpi në fshatin Kagjinas, 35-vjeçari ishte mbuluar me djersë dhe vazhdonte enjtja e fytit ndërsa kishte konsumuar ilaç pluhur menjëherë pas vizitës te mjeku stomatolog. Ajo pati një bisedë të shkurtër me djalin, i cili ishte futur brenda në shtëpi për t’u shtrirë se nuk ndihej mirë. Pasi mbaroi punët që kishte jashtë, nëna u fut brenda dhe u trondit kur pa djalin akull të ftohtë dhe nuk reagonte kur e thërriste. Menjëherë kërkoi ndihmë nga fqinjët, të cilët lajmëruan ambulancën por nuk pritën derisa të vinte dhe u nisën vetë që ta çonin drejt spitalit. Teksa po transportohej me automjet privat, bashkëfshatarët hasën ambulancën në gjysmë të rrugës dhe mjekët konstatuan se kishte humbur shenjat e jetës. Prindërit presin përgjigjen e autopsisë për të mësuar çfarë i shkaktoi vdekjen djalit në moshë të re ndërsa thonë se nuk kishte sëmundje të tjera.

“Djali erdhi nga Erseka. Dentisti i kishte dhënë recetën me ilaçe që i mori në farmaci. Kishte shqetësime nga dhëmballa, thoshte më dhemb koka ndërsa i ishte ënjtur gusha. Një ilaç me pluhur e kishte pirë në Ersekë ndërsa tjetrin me kokrra që kishte marrë, e konsumoi në shtëpi. Erdhi rreth orës 10, në 10:30 i piu. Ilaçi pluhur që kishte konsumuar, e kishte bërë me djersë.

Sa erdhi, zbriti nga makina dhe u ndërrua se ishte bërë ujë në djersë. Kur erdha unë nga lopët që ishte ora 15:30 ,16:00 djali po rrinte në ballkon dhe më foli, hë me mami mbarove andej, mbarove me lopën? Sa hoqa çorapet i hodha dhe bukë qenit, as 5 minuta nuk qëndrova jashtë dhe hyrë në kuzhinë, ku ishte shtrirë djali. Unë e thërrisja, e fërkoja nga duart, djali ishte bërë akull. Kur nuk mu përgjigj, ngrita kujën, dola thirra komshinjtë që ta merrnin e ta çonin e Ersekë. Dy djem lajmëruan ambulancën. E nxorën djalin me makinë dhe rrugës kishin gjetur ambulancën.

Qëkur ishte fëmijë derisa u bë 35 vjeç, nuk ishte shtruar një herë në spital, nuk kishte bërë asnjë gjilpërë në trup, nuk ankohej për gjë edhe gripërat atë rrallë e zinin. Djali të mërkurën ishte edhe në punë por nuk ishte kaq keq. Kur e pamë të ënjtur, i thamë të vizitohej”, rrëfeu nëna.

“Djali vajti tek dentisti në Ersekë, mori recetën më pas vajti tek farmacia dhe erdhi këtu (në shtëpi). Piu ilaçet sapo erdhi në shtëpi. Koka i dhimbte dhe nga fyti ishte ënjtur kishte dhe shumë djersë. Djali nuk vuante nga asnjë sëmundje tjetër. Vetëm nga dhëmballa”, tha babai.

Sot pritet të kryhet ekspertiza mjekoligjore për Genti Isaj, i cili ka humbur jetën në rrethana të çuditshme pas mjekimit për dhëmballën. Burime pranë familjes bëjnë të ditur se 35 vjeçari nuk ishte konsumues i substancave narkotike.