Në Maqedoninë e Veriut sot mbahen zgjedhjet parlamentare dhe raundi i dytë i zgjedhjeve presidenciale.

Kutitë e votimit në 3840 vendvotime u hapën në ora 07:00 e do mbyllen në 19:00, ndërsa të drejtën e votës e kanë mbi 1.8 milion votues, të cilët do votojnë për 17 parti politike dhe koalicione.

Po sot do votohet edhe për raundin e dytë për zgjedhjet presidenciale, ku në garë janë Stevo Pendarovski nga koalicioni i LSDM-së dhe Gordana Siljanovska-Davkova nga koalicioni i VMRO-DPMNE-së.

Që zgjedhjet presidenciale të jenë të suksesshme, përveç se njëri nga dy kandidatët duhet t’i fitojë shumicën e votave të qytetarëve, kërkohet edhe që dalja në zgjedhje të jetë së paku 40 për qind e qytetarëve të regjistruar në Listën Zgjedhore, ose rreth 725.000 votues.

Komisioni Shtetëror Zgjedhor (KSHZ) njoftoi se sot qytetarët do të mund të hyjnë në vendvotim vetëm një herë dhe do t’u ofrohet mundësia të votojnë për president dhe deputetë ose vetëm për njërën nga dy zgjedhjet e mundshme.

“Votuesi merr dy fletë votimi nëse vendos të votojë për të dyja llojet e zgjedhjeve ose vetëm një fletë votimi për zgjedhjet për të cilat vendos të votojë”, theksuan nga KSHZ.

Zgjedhjet do vëzhgohen nga 2000 vëzhgues, nga të cilët 1078 janë vendas dhe 770 vëzhgues të huaj. Zgjedhjet do të ndiqen nga 66 gazetarë të huaj.

Misioni i OSBE/ODIHR ka akredituar 410 vëzhgues dhe 14 ekspertë. Zgjedhjet do të monitorohen nga 138 vëzhgues nga Asambleja Parlamentare e OSBE-së, komisioni ad hoc i Asamblesë Parlamentare të Këshillit të Evropës me 33 vëzhgues, si dhe 68 vëzhgues nga Ambasada Amerikane në Shkup.

“Presidenti kinez Xi Jinping do të kalojë pjesën më të madhe të turneut të tij pesë-ditor në Evropë këtë javë në dy vende të vogla në pjesën lindore të kontinentit, në një rajon që Pekini e ka përdorur si bazë për ambiciet e tij për zgjerim ekonomik në Evropë”- kështu shkruan associated Press në një artikull për vizitën e presidentit kinez në Serbi dhe Hungari.

“Pas Parisit, Xi do të udhëtojë në Hungari dhe Serbi, dy vende me liderë autokratë që konsiderohen miqësorë me Kinën dhe afër presidentit rus Vladimir Putin”- shkruan agjencia.

Ndërsa liderët konvencionalë evropianë kanë ndjekur më shumë politika proteksioniste për të kufizuar hyrjen e Pekinit dhe Moskës në kontinent, qeveritë e liderëve konservatorë nacionalistë Viktor Orbán i Hungarisë dhe Aleksandër Vuçiç i Serbisë kanë zhvilluar fuqishëm lidhjet ekonomike me Kinën, duke ofruar investime të mëdha në infrastrukturë, prodhim energjie dhe teknologji.

Si vendi i parë i BE-së që merr pjesë në Iniciativën e Xi-t “Një brez dhe një rrugë”, Hungaria zë një pozicion të ndërmjetëm midis anëtarësimit në Bashkimin dhe NATO-s dhe është jashtëzakonisht e hapur diplomatikisht dhe komercialisht ndaj autokracive lindore.

Tamas Matura, një ekspert i Kinës dhe profesor i asociuar në Universitetin Corvinus në Budapest, tha se Hungaria është shtëpia e investimeve të mëdha kineze dhe se gatishmëria e saj për të bërë biznes me vende me performancë më pak se yjore për demokracinë dhe të drejtat e njeriut, ka hapur një derë të rëndësishme për Kinën brenda bllokut tregtar të BE-së.

Në Serbi, në jug të Hungarisë, Kina ka miniera dhe fabrika në të gjithë vendin dhe ka financuar rrugë, ura dhe ndërtesa të reja me hua shumë miliardëshe për infrastrukturën.

Hungaria dhe Serbia, kujton agjencia amerikane e lajmeve, kanë një marrëveshje me Pekinin për modernizimin e hekurudhës mes kryeqyteteve, Budapestit dhe Beogradit, si pjesë e planit Belt and Road, për t’u lidhur me portin e Pireut në Greqi, i cili është nën kontrollin kinez dhe është një pikë hyrëse për mallrat kineze në rrugën e tyre drejt Evropës Qendrore dhe Lindore.

AP citon presidentin serb Aleksandar Vuçiç të ketë thënë se është i “nderuar” që Xi, të cilin ai e përshkruan si “mik”, do të vizitojë Serbinë e cila do të kërkojë investime shtesë kineze, veçanërisht në teknologjitë e avancuara.

Investime të tilla vijnë në një kohë kur ekonomitë e ngadalta të Serbisë dhe Hungarisë po përballen me vështirësi shtesë për shkak të inflacionit rekord dhe ngrirjes së fondeve shumë miliarda euro të BE-së, në këtë rast Hungarisë, për shkak të dështimit të Orbanit për të përmbushur standardet demokratike dhe mosrespektimin e shtetit të së drejtës, sipas Unionit.

Një ngjarje e rëndë ka ndodhur në shtetin grek, ku një 41-vjeçar ka humbur jetën si pasojë e një atentati në Selanik.

Autorët e atentatit, dy burra dhe një grua, udhëtonin në një mjet tip Renault pa targa

Më pas, njëri prej personave qëlloi të paktën tre herë mbi 41-vjeçarin, i cili lëvizte me motor dhe sapo kishte hequr kaskën.

Një nga plumbat e kapi viktimën në shpinë duke i prekur zemrën, ndërkohë që një tjetër e goditi në shpatull.

Viktima zbriti nga motorri, eci për pak metra dhe më pas u rrëzua në tokë i vdekur.

Një ngjarje e rëndë ka ndodhur në fshatin Livadia, të Greqisë.

Një vajzë 15-vjeçare u gjet e vdekur në banjën e shtëpisë së saj.

Prindërit e saj thirrën menjëherë një ambulancë, por tashmë ishte tepër vonë për vajzën.

Sipas medieve greke, 15-vjeçarja kishte ardhur nga Gjermania në Greqi me familjen e saj për të kaluar Pashkët Ortodokse.

Policia përjashtoi aktivitetin kriminal dhe gjithçka tregon se 15-vjeçarja ka humbur jetën për shkaqe patologjike.

Megjithatë, për të hedhur më shumë dritë mbi ngjarjen tragjike u urdhërua një autopsi.

Gazeta gjermane Frankfurter Allgemeine Zeitung shkruan se vendet e Ballkanit janë vënë në mes të dy zjarreve. Nga njëra anë është emigracioni dhe rënia e lindjeve dhe në krahun tjetër është imigracioni nga Azia, për të cilin këto vende nuk janë ende të përgatitura. Autori i shkrimit, Michael Martens tregon një anekdotë për një konferencë ku po diskututohej për rrezikun e shpërthimit të një lufte në Evropën Juglindore.

Njëri nga pjesëmarrësit u ngrit dhe tha se ky rrezik nuk ekzistonte sepse në këto vende ka mungesë të ushtarëve. Autori i tekstit nuk mendon se rreziku i luftës nuk ekziston, duke pretenduar se edhe forcat speciale të armatosura mirë mund të bëjnë shumë dëm, por është e vërtetë se Ballkani po vuan nga mungesa e ushtarëve. Ai merr Serbinë si shembull.

“Serbia, për shembull, ka disa vite që është armatosur rëndë, me raketa, dronë dhe sisteme kundërajrore nga Kina dhe Rusia, të cilat së shpejti duhet të plotësohen me avionë luftarakë francezë Rafale. Kjo është vetëm një pjesë e tablosë. Tjetra është se Serbisë, sikurse edhe vendeve të tjera të rajonit, i mungojnë ushtarët që dinë ta përdorin këto teknika të shtrenjtë. Ushtria serbe ka diçka më shumë se 300 tanke, por më së shumti një e treta e tyre ka ekuipazhe të trajnuar”, – shkruan FAZ.

Në shkrim citohet fakti se oficerët janë të detyruar të bëjnë shkurtime për shkak se ka pak të rinj që u përgjigjen thirrjeve ushtarake, të cilat nuk janë më aq tërheqëse. Për më tepër, emigracioni e ka përkeqësuar problemin sepse “vendet e rajonit nuk janë më tërheqëse për të mbajtur popullsinë e tyre të re apo për të tërhequr emigrantë “.

“Në 6 vendet e Ballkanit Perëndimor, të cilat nuk janë ende anëtare të Bashkimit Evropian dhe nuk kanë akses të barabartë në tregun e tij dhe 4 liritë e tij, situata nuk duket aq e mirë”, – shkruan FAZ, duke thënë se për shumë të rinj në këto vende, emigracioni duket se është ende alternativë më e mirë se ushtria.

Thuhet se politikanët në atë rajon e kuptuan vonë seriozitetin e situatës demografike dhe se tani janë në garë për të tërhequr punëtorë të huaj. “Transporti i qytetit të Beogradit është duke punësuar shoferë autobusësh nga India apo Sri Lanka sepse nuk ka të interesuar vendas. Vendi më i varfër në Evropë, Kosova solli me avion punëtorë nga Bangladeshi për projekte të mëdha”.

Ky realitet i ri do t’i vendosë shoqëritë në rajonin e Ballkanit përpara sfidave të vështira, paralajmëron FAZ, sepse emigrantët nga Azia dhe Afrika do të lindin fëmijë, do të blejnë pasuri të paluajtshme, do të ushqejnë traditat dhe fetë e tyre dhe do të ndryshojnë pamjen e qyteteve në Evropën Juglindore, diçka me të cilën nuk janë mësuar në atë rajon. “Potenciali i konfliktit është i dukshëm. Është e vërtetë që Ballkani ka qenë multietnik prej shekujsh. Por, të pranosh se zona është një rajon emigrantësh ose që duhet të bëhet një, për të mbajtur veten ekonomikisht, është e vështirë për pushtetarët të pranohet”, – përfundon Frankfurter Allgemeine Zeitung.