Nostradamusi Vuçiç në veprim, bën parashikimin e ‘hollë’ për Kosovën

Presidenti i Serbisë, Aleksandër Vuçiç ka thënë se Serbia do të vazhdojë të luftojë edhe pse ka kundërshtarë fuqitë dominuese të Perëndimit, duke theksuar se kur është fjala për anëtarësimin e Kosovës në KE, shpjegimet e tyre për atë proces janë nga më qesharaket, duke qenë se tashmë Prishtina për 11 vite nuk e ka përmbushur obligimin për formimin e aaociacionit te komunave me shumicë serbe.

Ai shprehu gjithashtu besimin e tij se ekziston mundësia, falë avokimit francez, të shqyrtohet shtyrja e anëtarësimit të Kosovës në Këshillin e Europës.

“Në çdo rast, nuk do të jetë e lehtë. Ne kemi dërguar shumë letra zyrtare në adresa të ndryshme dhe do të vazhdojmë ta bëjmë. Po më thërrasin nga të gjitha anët e mundshme për të më bindur për diçka, për një lloj kompromisi” – ka theksuar Vuçiç duke shtuar se nuk do ketë asgjë të tillë.

Ai tregoi edhe se votimi në Asamblenë Parlamentare të Këshillit të Evropës për pranimin e Kosovës do të kalojë sot, duke shtuar se beteja kryesore për Serbinë është më 16 maj.

Duke folur për rezolutën për gjenocidin në Srebrenicë, që duhet të votohet në OKB, ai deklaroi se Serbia do të bëhet simbol i rezistencës dhe lirisë në mbarë botën dhe sic u shpreh ai, “të gjithë do befasohen”.

Duke komentuar deklaratën e tij se do të luftojë për të treguar se serbët nuk janë më të këqijtë dhe se ata nuk janë komb gjenocidal, presidenti me ironi vërejti se në Perëndim thonë se rezoluta nuk i referohet popullit.