OKB-ja paralajmëron për rikthimin e “diktatorëve”

Epoka e “diktatorëve” që kryen krime mizore “mund të ndodhë përsëri”, paralajmëroi Komisioneri i Lartë i OKB-së për të Drejtat e Njeriut, Volker Türk, të hënën.

“Në shekujt e mëparshëm, përdorimi i shfrenuar i forcës nga sulmet e fuqishme, pa dallim ndaj civilëve, transferimet e popullsisë dhe puna e fëmijëve ishin të zakonshme. Diktatorët mund të urdhëronin krime të tmerrshme që çonin drejt vdekje një numër të madh njerëzish. Kujdes: kjo mund të ndodhë përsëri”, paralajmëroi Komisioneri i Lartë përpara Këshillit të të Drejtave të Njeriut.

Të drejtat e njeriut “po mbyten njëra pas tjetrës”, denoncoi gjithashtu të hënën Sekretari i Përgjithshëm i OKB-së Antonio Guterres.

“Të drejtat e njeriut janë oksigjeni i njerëzimit. Por ato po mbyten, njëra pas tjetrës”, tha Antonio Guterres, i cili hartoi një listë të gjatë të atyre që po i mbytin.

Sipas tij, kjo situatë përfaqëson një kërcënim të drejtpërdrejtë për të gjithë mekanizmat dhe sistemet e krijuara me shumë vështirësi gjatë 80 viteve të fundit për të mbrojtur dhe avancuar të drejtat e njeriut.

Këto të drejta të njeriut mbyten “nga autokratët, të cilët shtypin opozitën sepse kanë frikë se çfarë do të ishte në gjendje një popull me mjete të plota për të vepruar”, thekson shefi i OKB-së, por pa përmendur asnjë shembull.

Ai denoncon gjithashtu rolin e “patriarkatit, i cili i pengon vajzat të shkojnë në shkollë dhe gratë të gëzojnë të drejtat e tyre themelore” apo edhe “luftënxitësit, të cilët përqeshin të drejtën ndërkombëtare, të drejtën ndërkombëtare humanitare dhe Kartën e Kombeve të Bashkuara”.

Antonio Guterres përfitoi gjithashtu nga kjo platformë për të denoncuar edhe një herë “teknologjitë e pakontrollueshme si inteligjenca artificiale, të cilat ngjallin shpresa të mëdha, por gjithashtu përmbajnë kapacitetin për të shkelur të drejtat e njeriut me një klikim të vetëm”