Pa kosovën, Vuçiç mbetet pa ‘levën e Arkimedit’ të pushtetit

Florian Bieber, studiues i Evropës Juglindore në Universitetin e Grazit në Austri, ka thënë se historia e njohjes reciproke në mes Kosovës dhe Serbisë “nuk më duket reale”.

Këto komente ai i ka bërë në një intervistë për “AlJazzera”, ku theksoi se nuk është optimist në zgjidhjen e shpejtë të problemit në mes të dy vendeve.

Madje, sipas tij, me Albin Kurtin në Kosovë dhe Aleksandër Vuçiç-in në Serbi, “gjërat janë edhe më shumë të vështira”.

“Kam qenë prej kohësh skeptik se Vuçiç dëshiron ndonjë zgjidhje afatgjate”, sepse, kjo do ta linte atë pa një mjet kyç për politikën e brendshme dhe do ta bënte atë më të prekshëm në skenën e brendshme në një kohë kur është e qartë se ai nuk është aq i fuqishëm sa ishte disa vite më parë” – deklaroi Bieber

Pikerisht, duke pasur parasysh këtë, profesori austriak vlerëson se njohja e ndërsjellë duket “joreale”.

Përsa i përket mundësive që Ballkani Perëndimor të anëtarësohet në Bashkimin Evropian më 2030, siç kanë deklaruar disa zyrtarë të lartë të Unionit, përsëri Bieber shprehet skeptik se një gjë e tillë mund të ndodh, posaçërisht për disa shtete.

“Vende si Mali i Zi, Maqedonia e Veriut dhe Shqipëria mund ta arrijnë këtë brenda asaj periudhe. Megjithatë, ka sfida të dukshme kur flitet për Bosnje e Hercegovinën, Serbinë dhe Kosovën, ku dinamika aktuale e bën datën e përmendur joreale” – beson Florian Bieber