Paralajmërimi i Sonja Biserkos për kishën serbe, ngrihet alarmi

Ballkani prej kohësh është në tension për shkak të provokimeve të vazhdueshme të shkaktuara nga Serbia, e cila me deklarata dhe veprime të njëpasnjëshme po dëmton paqen dhe sigurinë e rajonit.

E këtij mendimi është edhe kryetarja e Komitetit të Helsinkit në Serbi, Sonja Biserko. Ajo tha se presidenti i Serbisë Aleksander Vuçiç po e destabilizon Serbinë dhe fqinjët, përfshirë Kosovën, përmes Kishës Ortodokse Serbe dhe shërbimeve të sigurisë.

“Madje, mund të konstatohet se bashkësia ndërkombëtare po i kushton më shumë vëmendje vendeve fqinje, te cilat Serbia po i destabilizon me politikën e saj, para së gjithash përmes aktiviteteve të Kishës Ortodokse Serbe dhe shërbimeve të sigurisë me mbështetje të madhe financiare” – tha Biserko për media opozitare serbe ‘Danas’

Sipas saj duke pasur parasysh raportin e Pentagonit që parashikon mundësinë e konfliktit etnik në Ballkan, duhet t’i kushtohet vëmendje deklaratave luftarake te Vucicit, siç ishte ajo e para pak ditëve drejtuar Kosoves.

Në lidhje me këtë temë, ka folur edhe eksperti i sigurisë, Drizan Shala, i cili tha se “Kisha në Serbi gjithmonë ka qenë e rrezikshme dhe ka prodhuar urrejtje ndëretnike”.

Sipas tij, nuk ka qenë asnjëherë i fshehtë fakti që Kisha Ortodokse Serbe ka promovuar vazhdimisht fashizëm.

“Kisha Ortodokse Serbe termin zyrtar e ka Kisha Ortodokse Sllave. Nga vetë tituli, kemi të bëjmë me një qëllim politik, dhe nuk ka qenë asnjëherë i fshehtë fakti që Kisha Ortodokse Serbe ka promovuar vazhdimisht fashizëm, dhe një klero-fashizëm të cilën kleri politik gjithmonë e ka përqafuar.

Kisha në Serbi është promotori kryesor që prodhon urrejtje ndëretnike. Po bëhet një lojë mjaft e rrezikshme, e cila i ka detyruar këta njerëz të kapin armët me iluzionin se nuk ka kush i pengon. Dhe kjo nuk ka qenë një befasi e madhe që ata iu drejtuan manastirit” – u shpreh Shala.

Më tej, eksperti theksoi që kufiri fetar në mbështetje të kufirit ushtarak po japin indikacion që kufiri politik shtetëror në gadishull mund të marr një formë të re nga ndryshimet gjeopolitike dhe strategjike në sferën globale.

“Që nga periudha osmane, serbët i kanë përdorur manastiret për punë të ngjashme, prandaj dhe raporti I Inteligjencës Amerikane është shqetësues për involvimin e një luftë special. Kufiri Fetar në mbështetje të kufirit ushtarak po japin indikacion që kufiri politik shtetëror në gadishull mund të marr formë të re nga ndryshimet gjeopolitike dhe strategjike në sferën globale” – theksoi eksperti i sigurisë, Drizan Shala.