PD-ja gjen veten tek Luizi, publikon videon

Një video nga diskutimet në shtëpinë e “Big Brother Vip Albania” po gjen shpërndarje masive në rrjet e sidomos në radhët e opozitës shqiptare. Deklaratat e bëra nga konkurrenti Luiz Ejlli, banor i BBV po shpërndahen nën etiketën se tashmë që situata u deklarua nga Luizi, vula i është vënë dhe vërtet gjendja ekonomike është e keqe.

Kjo nuk do të përbënte lajm nëse do të qendronte vetëm në “feed”-in e fansave të programit dhe nuk do të kalonte në botim zyrtar në disa nga portalet pranë opozitës, në Facebook e një ish-kryetari Partie si Petrit Vasili apo në faqen e parë të gazetës “Rilindja Demokratike”.

Inagurimin e mungesës së ideve në këtë vend e ka bërë fillimisht Rilindja me ardhjen në pushtet, por më shumë e forcojnë çdo ditë edhe episode si ky nga ana e opozitës. A ka opozita një program, një alternativë përtej konstatimeve të një personazhi që i përngjajnë atyre hartimeve shabllone të klasës fillore?

“Referuar shifrave të INSTAT, lindjet në Shqipëri janë shifra shqetësuese. Tregon se njerëzit nuk kanë mundësi, as siguri për të krijuar familje. Ka plot që ikin jashtë? Nuk ka plot, janë me gishta ata që ikin jashtë me studime, sepse s’kanë mundësi familjet.

Pjesa më e madhe ikin me gomone, me kamionë dhe jemi duke punuar për drogën e komplet Europës. Jemi përditë në lajme. Po kalojmë edhe Sirinë në kërkesat për azil. Ky vend ka shkuar aty nuk mban më. Përgjegjësinë nuk e mban askush. Ky vend nuk bëhet.

Se si do të bëhet askush nuk e di. Më keq nuk ka qenë. Ke njerëz që nuk kanë bukë të hanë dhe ke çdo ditë kulla që lulëzojnë në Tiranë me nga 7-10 mijë euro m2. Kush i blen? Kush i ndërton?

Përditë duke lulëzuar këto kompani. Kam jetuar në Paris, e di sa janë çmimet e apartamenteve atje dhe e di sa janë te liqeni. Janë të frikshme. Janë dyfish te liqeni. Kush i blen? Kush i kontrollon? Këtu nuk funksionon asgjë më. Në Shqipëri janë kamarierët të gjithë me diploma të shkollës së lartë, me juridik” –tha Luizi.

Video: