Për herë të parë, Vuçiç nuk di ç’të bëjë/ Ja çfarë shkruan media gjermane

“Protestat në Serbi pas aksidentit në Novi Sad kanë tronditur autokracinë” – keshtu shkruan gazeta gjermane “Tageszeitung”.

Autori i artikullit, Andrej Ivanji, e hap tekstin në të përditshmen berlineze me një citim të presidentit serb Aleksandar Vuçiç nga profili i tij në Instagram: “Edhe pse mendoni se jam si Asadi, që do arratisem – nuk jam si ai”.

Kjo deklaratë “dramatike”, sipas Ivanjit, është rezultat i protestave të studentëve në Serbi, te cilet kanë bllokuar mësimin në 33 fakultete në katër qytete universitare të vendit. “Numri i tyre është dyfishuar që nga java e kaluar, kur Vuçiçi i tallte dhe i akuzonte se marrin para nga kriminelë vendas dhe të huaj, me qëllimin e vetëm për ta larguar atë nga pushteti”.

Gazeta berlineze shkruan se “autokracia pseudostabile e Serbisë, një vend kandidat për anëtarësim në BE, është tronditur befas, sepse kanë ngritur zërin të rinjtë që më parë konsideroheshin apolitikë”.

Sipas artikullit, “për autokratin serb Aleksandar Vuçiç gjithçka ka shkuar mirë për 12 vite. Ai ka shkelur hap pas hapi Kushtetutën dhe ligjet, ka vënë nën kontroll institucionet shtetërore dhe median, dhe ka tentuar t’i mbyllë gojën shoqërisë civile. Me lehtësi ka mposhtur opozitën e ndarë. Protestat sporadike, madje edhe ato masive, i ka neutralizuar me përdorim minimal të forces dhe Vuçiç dukej i paprekshëm”.

Demonstratat në Beograd po zhvillohen me moton “15 minuta për 15 viktima”. Gjatë njërës prej tyre disa studentë të Fakultetit të Arteve Dramatike u rrahën nga persona të njohur si anëtarë të SNS, partisë qeverisëse. Si reagim, studentët bllokuan fakultetin dhe kërkuan arrestimin e agresoreve. Më pas, bllokada u zgjerua në fakultete të tjera, duke sjellë edhe kërkesa të reja.

“Situata ngjan me protestat studentore në Serbi ne vitet 1996/1997, që çuan në rënien e Slobodan Millosheviçit, shkruan Ivanji dhe thekson se mbi një mijë profesorë dhe shkencëtarë kanë nënshkruar një peticion në mbështetje të studentëve, të cilët po mbështeten gjithashtu nga shumë aktorë dhe punonjës të arsimit, ndërsa paralelisht edhe fermerët kanë organizuar protesta. Për herë të parë, duket se Aleksandar Vuçiç nuk di çfarë të bëjë” – shkruhet ne median gjermane.