Perëndimi naiv/ Ekspertja amerikane: Ende po beson te Vuçiç

Ivana Stradner, specialiste në fushën e sigurisë dhe informacionit, gjithashtu vëzhguese dhe njohëse e zhvillimeve politike në Ballkanin Perëndimor , ka kritikuar Perëndimin, kryesisht Shtetet e Bashkuara të Amerikës në raport me qasjen e tyre ndaj Serbisë dhe specifikisht ndaj presidentit, Aleksandër Vuçiç.

Stradner, e cila është edhe hulumtuese në Fondacionin për Mbrojtjen e Demokracive, vlerëson se SHBA-të me naivitet akoma po besojnë se me sjelljen e tyre do ta afrojnë Serbinë më pranë NATO-s dhe Bashkimit Evropian.

Bllofi i Vuçiç-it, sipas ekspertes amerikane, nuk i intereson fare Rusisë, meqë presidenti Vladimir Putin, beson ajo, “e di shumë mirë që Vuçiç po blen kohë deri në vitin e ardhshëm”.

“Është e turpshme se si Rusia po luan me Perëndimin si fyell në Ballkan”, ka shkruar Stradner në platformën sociale, X.

Nga ana tjetër, shefi i Shtabit të Përgjithshëm të Forcave të Armatosura të Serbisë, Milan Mojsiloviç, ka pretenduar se situata në Kosovë është tejet e komplikuar.

Në një intervistë për mediumi serb, TV Prva, komandanti i Ushtrisë Serbe, ka thënë se shpreson që Misioni i NATO-s në Kosovë, KFOR-i, do të ketë fuqi të mjaftueshme për të stabilizuar situatën dhe për të mbrojtur popullin serb në Kosovë.

Situata në Kosovë, sipas pretendimeve të ushtarakut, Mojsiloviç është shumë e komplikuar meqë ka mungesë të bisedimeve për normalizimin e raporteve ndërmjet Kosovës dhe Serbisë” dhe ka pretenduar se në Veri të Kosovës aktualisht ka një angazhim të tepruar të Policisë së Kosovës.