Përplasje mes miliarderëve/ Musk një sërë akuzash: Krimet e George Soros kundër njerëzimit janë të shumta

Billioneri Elon Musk ka hedhur akuza të rënda ndaj miliarderit dhe aktivistit politik George Soros, duke e akuzuar atë për “krime të shumta dhe të larmishme kundër njerëzimit”. Deklarata e Musk u bë në një postim të shkurtër në rrjetin social X, si përgjigje ndaj një përdoruesi që e kishte kritikuar për lidhjet e tij me Sorosin. Musk ka zgjedhur të shprehet ashpër në lidhje me rolin e Sorosit në politikën ndërkombëtare dhe ndikimin e tij të gjerë.

George Soros është një figurë tejet e diskutueshme, e njohur për financimin e lëvizjeve politike dhe shoqërore në shumë vende, përfshirë Revolucionin Portokalli në Ukrainë dhe Euromaidanin. Përmes fondacioneve të tij, ai ka luajtur një rol të rëndësishëm në ngritjen e protestave dhe reformave të ndryshme, disa prej të cilave janë akuzuar për ndërhyrje në punët e brendshme të shteteve dhe për favore të grupeve të caktuara, përfshirë oligarkët.

Në Shqipëri, Soros është kritikuar për ndikimin e tij në politikat e qeverisë, veçanërisht në periudhën e qeverisjes së Edi Ramës. Kritikat ndaj Sorosit nuk janë të reja, dhe kanë përfshirë edhe akuza për shkelje të ligjit, siç është kërkesa e presidentit të mëparshëm të SHBA-ve, Donald Trump, për nisjen e një hetimi ndaj tij për shkelje të mundshme të ligjit RICO. Edhe pse Soros ka mohuar akuzat, figura të tilla të debatueshme vazhdojnë të ngjallin reagime të forta në politikën ndërkombëtare.