Pesë arsye që çojnë në ndarje

Nëse problemet në marrëdhënien tuaj vazhdojnë të grumbullohen dhe ndiheni sikur partneri juaj është larguar, mbase jeni duke bërë një nga këto pesë gabime.

Shumë kritika

Sipas shkencëtarëve, dialogët mes çifteve duhet të përfshijnë 80% komente pozitive ose neutrale dhe vetëm 20% kritika.

Megjithatë, në shumë marrëdhënie, situata dhe përqindjet janë të kundërta. Një partner  thuajse vazhdimisht i shpreh ankesat dhe pakënaqësitë e tij tjetrit, i cili më pas fillon të ndiejë se nuk po bën asgjë siç duhet dhe tërhiqet emocionalisht.

Kur në mosmarrëveshje dhe grindje gjithmonë “fitohet”

Nëse argumentet kanë gjithmonë të njëjtin fitues, atëherë ndoshta ka një problem diku. Pra, personi që del “i humbur” në të gjitha konfliktet, edhe nëse ka të drejtë dhe që nuk mund t’i shprehë aq mirë mendimet dhe ndjenjat e tij, ka gjasa të fillojë të tërhiqet nga lidhja. Me kalimin e kohës ai e konsideron të kotë të hyjë në diskutime dhe të shprehë shqetësimet e tij, ndaj heq dorë nga çdo përpjekje.

A është partneri juaj jo mbështetës?

Imagjinoni të keni një problem që po ju shkakton ankth ose dhimbje emocionale dhe partneri/partnerja juaj nuk po ju tregon mirëkuptimin ose mbështetjen që ju nevojitet.

Si do të ndiheshit dhe cili do të ishte reagimi juaj? Natyrisht ne presim që partneri ynë të jetë personi tek i cili mbështetemi për çështjet që kemi nevojë. Pra, kur ai person vazhdimisht dështon ose (madje më keq) nuk përpiqet të na mbështesë, atëherë është krejtësisht normale të kërkojmë diku tjetër për përmbushje emocionale.

A i injoron ankesat tuaja?

A i keni shprehur ndonjëherë një ose më shumë ankesa partnerit tuaj dhe keni ndjerë se ai ju injoron vazhdimisht? Është e mundur që të jeni ndjerë i/e lënë pas dore, madje edhe i/e refuzuar.  Ju nuk do t’i shprehni ankesat tuaja përgjithmonë, por do të ndaleni kur të ndjeni se jeni refuzuar dhe lënduar aq shumë sa nuk keni forcë të provoni përsëri. Në këtë pikë dëmi është bërë tashmë.

Kontributi i teknologjisë

Shumë prej nesh janë pothuajse të varur nga celularët dhe ekranet dhe u kushtojmë atyre më shumë rëndësi se sa partnerit.

Pra, kur vazhdimisht shikojmë pajisjet digjitale ose i përdorim ato gjatë momenteve që duhet t’i ndajmë vetëm me partnerin tonë, atëherë kjo mund të ketë një efekt jashtëzakonisht negativ në disponimin, lumturinë dhe kënaqësinë e marrëdhënies së partnerit tonë.