Peshorja anon nga Serbia/ Kurti: Propozimi i BE’së për Ohrin është i pabalancuar

Kryeministri i Kosovës, Albin Kurti është shprehur i pakënaqur me planin e BE’së për zbatimin e marrëveshjes së Ohrit. Ai ka theksuar se sekuencimi, çfarë ka propozuar BE-ja, nuk mund të ketë më shumë se gjysmën të dedikuar për nenet 7 dhe 10 – që flasin për vetëmenaxhim dhe zbatim të plotë të marrëveshjeve dhe theksoi se është i angazhuar në dialog, por tha se po mungon zbatimi i sekuencimit të plotë e pa kushte e pa vonesa i Marrëveshjes bazike dhe Ankesit të zbatimit.

“Një sekuencim do duhej të ishte i balancuar dhe fer, por praktikisht është krejt i ndryshëm prej asaj që na është ofruar më 26 prill. Jemi të përkushtuar e konstruktivë, por s’mundet çfarëdo sekuencimi  të ketë më shumë se gjysmën dedikuar neneve 7 dhe 10. Unë e kuptoj që nenet 7 dhe 10 janë nene të marrëveshjes bazike dhe unë jam i interesuar që t`i përfshijë patjetër në sekuencim, por dedikimi atyre nuk mund të jetë prioritet jashtë cdo përmase” – ka deklaruar Kurti.