Petritsch: Banjska, paralajmërim i fortë për Perëndimin

Ish-Përfaqësuesi Special i Bashkimit Evropian për Kosovën, Wolfgang Petritsch, tha se Banjska duhet të shërbejë si një paralajmërim i rëndësishëm për të gjithë, sepse çdo konflikt që përfshin viktima e përkeqëson situatën. Prandaj, ai thekson se gjendja e sigurisë duhet të jetë prioritet i lartë dhe KFOR-i duhet të forcohet.

Sipas tij, besimi është një parakusht për negociata të suksesshme në përgjithësi dhe ai nuk ka qenë kurrë në një nivel të lartë. Besimi minimal duhet të rivendoset dhe nevojitet një kthim në tryezën e negociatave.

“Ekipi aktual negociator, Miroslav Lajçak dhe Josep Borrell, me sa duket do të zëvendësohet pas zgjedhjeve të BE. Pas zgjedhjeve do të ketë një shpërndarje të re pushteti dhe një përbërje të re të Komisionit Evropian. Unë supozoj se do të ketë një ekip të ri për dialogun. Dialogu është i rëndësishëm, por mënyra se si është zhvilluar në dy vitet e fundit tregon se nuk po funksionon. Tani duhet të mendojmë se si të bëjmë përparim, çfarë ka pasur sukses, ku janë bërë gabime dhe ku duhet të ecim përpara. Ne duhet të reduktojmë emocionet, të eliminojmë kërcënimet dhe të themi – duam të gjejmë një zgjidhje për njerëzit. Gjithmonë harrohet se edhe pse ka të bëjë me sigurinë kolektive të shteteve, aspekti etnik nuk është i parëndësishëm” – theksoi Wolfgang Petritsch