Plan për të dështuar ekstradimin, Haxhiaj kontakton avokatin e Bledar Jambelli

Vurvaqis Jorgos, avokati grek që shpëtoi nga ekstradimi, Bledar Jambellin vrasësin e ish-kryepolicit të Vlorës, Artan Cuku, është kontraktuar nga i shumëkërkuari i drejtësisë Shqiptare, Laert Haxhiu, i cili prej 23 Majit është arrestuar në Greqi. Haxhiu ka përgatitur dhe dorëzuar tek autoritet Greke një kërkesë për marrjen e statusit të azilantit politik, pasi familja e tij është përndjekur në mënyrë të vazhdueshme nga anëtarët e bandës së Aldo Bare, përndjekje kjo që ka sjellë dhe viktima.

Aktualisht Haxhiu, po mbahet i izoluar në burgun e Koridhalosit në Athinë, ndërsa ka zgjedhur si studio avokatie, pikërisht avokatin që mbrojti interesat e Jambellit, i cili fitoi përpalljen gjyqësore me shtetin shqiptar, që kërkonte ekstradimin me çdo kusht të vlonjatit.

Laert Haxhiu, në Shqipëri po përballet me një proces gjyqësor në gjykatën e Posaçme SPAK, si person i dyshuar për vrasjen e Zamir Latifit, Jurgen Hoxhës, dhe plagosjen e Marius Xhepexhiut, Bujar Turkut. Nëse do shpallet fajtor nga gjykata, Haxhiu rrezikon dënimin me burgim të përjetshëm. Ndërkohë një dënim prej 18 vite heqje lirie Laert Haxhiu e ka marë në vitin 2018, për akuzën e vrasjes së mbetur në tentativë në dëm të Xhulio Shkurtit dhe mbajtjes pa lejë të armëve të zjarrit.

Por për ti shpëtuar përndjekjes së Drejtësisë Shqiptare dhe ekstradimit të tij nga Athina në Tiranë, Laert Haxhiu, ka kontraktuar avokatin grek Vurvaqis Jorgo dhe Detar Hysi. Avokati do synojë ndalimin e ekstradimit në Shqipëri të Laert Haxhiut, i cili mësohet se ka bërë dhe një kërkesë për azil politik në Greqi, pasi siç ka deklaruar dhe në seancën e gjyqësore në Janinë, familja e tij kërcënohet në mënyrë të vazhdueshme nga anëtarë të bandës së Aldo Bares.

Për këtë shkak, Haxhiu ka kërkuar të pajiset në Greqi me statusin e azilantit politik, duke synuar të ngadalësojë dhe dështojë procesin e ekstradimit të tij në Tiranë. Në kërkesën për marrjen e statusit të azilantit, Haxhiu pretendon se familja e tij, është përndjekur në mënyrë të vazhdueshme nga anëtarët e bandës së Aldo Bare, përndjekje kjo që ka sjellë dhe viktima. Për këtë shkak nëna dhe motra e tij, janë larguar nga Shqipëria duke marrë strehim politik në Gjermani.

Si pasojë e konflikteve, Laert Haxhiu ka tentuar të vrasë për qëllime hakmarrje në dy atentate Xhulio Shkurtin, nipin e Aldo Bares. Referuar historikut të konflikteve midis familjeve të Xhulio Shkurtit dhe Laert Haxhiut, hakmarrje e ka zanafillën herët, pasi banda e Aldo Bares alias Alfred Shkurti, i ka djegur shtëpinë xhaxhait të Laert Haxhiut, Shkëlqim Haxhiu.

Më pas në janar të vitit 2005 është vrarë djali i xhaxhait të Laertit, Klodian Haxhiu. Kjo hakmarje ka filluar të faktohet në vitin 2010, thotë prokuroria.

Nga ana tjetër Laert Haxhiu, ka qenë i akuzuar së bashku me Orgest Bilbilin, për ngjarjen e datës 8 korrik 2010 ku në Lushnjë është vrarë me armë zjarri Gerti Lala me pseudonimin “Iriqi”, i cili dyshohet se ka qenë pjesë e organizatës kriminale të drejtuar në Lushnjë nga Aldo Bare. “Iriqi“ ishte personi kryesor i dyshuar për vrasjen e Klodian Haxhiut.

Për vrasjen e Gerti Lalës (Iriqit), Laert Haxhiu dhe Orgest Bilbili janë arrestuar si të dyshuar dhe akuzuar dhe dërguar për gjykim, por më pas janë liruar duke u shpallur të pafajshëm nga gjykata e Apelit Vlorë.

Ndërkohë në vitin 2016 Laert Haxhiu tentoi të vriste Xhulio Shkurtin, vrasje të cilën nuk arriti ta finalizojë, duke e plagosur atë. Por sërish Haxhiu tentoi në mënyrë të organizuar të finalizojë në vitin 2017, atentatin kundër Xhulio Shkurtit, por nuk mundi ta vrasë pasi ky i fundit pak minuta para atentatit u largua nga lokali dhe shkoi tek berberi. Si pasojë e të shtënave në lokal, mbetën të vdekur dy shokët e Shkurtit, Zamir Latifi, Jurgen Hoxha, dhe u plagosën Marius Xhepexhiut dhe Bujar Turku./Ora