Plani serb për pushtimin e veriut, profesori godet Mogherinin e Thaçin

Dialogu Kosovë-Serbi vazhdon të jetë një nga çështjet më të rëndësishme dhe më të diskutuara në kohët e fundit. Si rrjedhojë, pjesë e diskutimeve kanë qenë edhe përfaqësuesit e Bashkimit Evropian, Josep Borell dhe Miroslav Lajçakt, të cilët jo pak herë janë akuzuar për njëanshmëri, më saktësisht për anim nga pala serbe. Sipas professor Sadri Ramabaja, dialogu Kosovë-Serbi ka degraduar nga rrafshi teknik në atë politikë, për shkak të përfaqësuesve të BE-së, përfshi edhe Federica Mogherinin dhe idenë për ta ndarë Kosovën.

“Dialogut mes Kosovës dhe Serbisë që lehtësohet dhe organizohet nga BE, e që ka filluar që më 8 mars të vitit 2011, i ka paraprirë Rezoluta e Asamblesë së Kombeve të Bashkuara e miratuar me 10 shtator të vitit 2010. Kjo rezolutë, shprehet në mënyrë taksative se mirëpret gatishmërinë e Bashkimit Evropian për të lehtësuar procesin e dialogut ndërmjet palëve, i cili do të ishte faktor i dobishëm për paqen, sigurinë dhe stabilitetin në rajon, do të nxiste bashkëpunimin dhe përparimin e dy vendeve në rrugën drejt Bashkimit Evropian dhe do të përmirësonte jetën e njerëzve. Pararendësit e Përfaqësuesit të Lartë të Bashkimit Evropian për Punë të Jashtme dhe Siguri -Josep Borell-it, sidomos zonja Federica Mogherini, natyrisht me pajtimin e ish kryeministrit të atëhershëm të Kosovës, Hashim Thaçin dhe përfaqësuesve të palës serbe, e degraduan dialogun nga rrafshi teknik siç sugjeronte rezoluta në fjalë, në rrafshin politik, duke shkuar edhe drejt pajtimit të fshehur për ndarjen e Kosovës, respektivisht aneksimit të veriut të Kosovës, Serbisë! Ky akt u pengua nga rezistenca e fuqishme e popullit tonë gjatë periudhës 2015-2020, por edhe nga miqtë tanë europian, para së gjithash: Gjermanisë dhe Britanisë së Madhe” – deklaroi profesori.

Krahas kësaj, Ramabaja përmendi edhe Lajçakun dhe përparsitë që po i jepen skenarëve të Serbisë, teksa dhe vlerësoi se vetëm rezistenca e Albin Kurtit do ndikonte në dështimin e planit serb për pushtimin e veriut. Ndër të tjera, Ramabaja tha se tani veriu është plotësisht nën kontrollin e forcave të sigurisë së Kosovës.