Presidenca e Kosovës ‘korrigjon’ deklaratën e Osmanit

Presidenca e Kosovës ka ‘korrigjuar’ deklaratën e presidentes kosovare, Vjosa Osmani, rreth “çmontimit të mbi 900 bandave kriminale” në pesë vitet e fundit në vend, duke theksuar se ajo i është referuar rasteve të regjistruara, kryesisht në pjesën veriore të territorit, jo numrit total të bandave kriminale në kuptimin e ngushtë të fjalës.

“Në fakt, është menduar për raste e jo për numër bandash. Siç e dini, disa banda serbe të veriut kanë qenë të involvuara në qindra raste të veprave penale”, thuhet në kumtesën e presidences kosovare, pas valës së reagimeve në opinionin publik.

“Në asnjë moment presidentja nuk e ka paraqitur Kosovën si vend të krimit, por si vend të rendit e ligjit dhe si vend ku respektohen në vazhdimësi vlerat evropiane të të drejtave të njeriut dhe sundimit të ligjit”, thuhet ndër të tjera në kumtesë.