Presioni i Aleatëve/ Kosova nën “syrin” e QUINT-it për formimin e qeverisë së re

Në prag të konstituimit të Kuvendit të ri të Kosovës më 15 prill dhe formimit të Qeverisë së re, shtetet aleate më të fuqishme të vendit—Shtetet e Bashkuara të Amerikës, Gjermania dhe Mbretëria e Bashkuar—kanë dalë me qëndrime të qarta e kërkesa të forta ndaj udhëheqjes së ardhshme.

Nën një frymë të përbashkët, ato bëjnë thirrje për besim të ndërsjellë, koordinim ndërkombëtar dhe përparim real në dialogun me Serbinë, si kushte të panegociueshme për ecjen përpara të Kosovës në rrugën euroatlantike.

Këto shtete, bashkë me Francën dhe Italinë, përbëjnë grupin e njohur diplomatikisht si QUINT, i cili ka luajtur rol kyç në zhvillimet politike dhe të sigurisë në Ballkanin Perëndimor.

Sipas axhendës së publikuar nga Kuvendi, më 15 prill do të mbahet seanca konstituive e legjislaturës së nëntë, ku deputetët e rinj do të japin betimin. Po atë ditë pritet edhe zgjedhja e kryetarit dhe nënkryetarëve të Kuvendit, një hap kyç për hapjen e rrugës drejt krijimit të qeverisë së re.

Partia fituese e zgjedhjeve të 9 shkurtit, Lëvizja Vetëvendosje e udhëhequr nga Albin Kurti, ka të drejtën e parë për të tentuar formimin e ekzekutivit. Megjithatë, Kurti ende nuk i ka siguruar 61 votat e nevojshme për shumicën parlamentare, gjë që lë hapësirë për lëvizje intensive politike në ditët në vijim.

Zyrtarë të lartë nga Departamenti Amerikan i Shtetit kanë deklaruar për Radion Evropa e Lirë se SHBA-ja mbetet e përkushtuar ndaj mbështetjes së Kosovës si një shtet sovran, demokratik, multietnik dhe prosperues. “Presim të punojmë me Qeverinë e re të Kosovës për të mbështetur stabilitetin dhe sigurinë rajonale”, tha një zëdhënës i DASH-it.

Ndërkohë, Ambasada e Gjermanisë në Prishtinë ka qenë edhe më e qartë në qëndrimin e saj. Përveç pritjes për konstituimin e suksesshëm të Kuvendit dhe formimit të qeverisë, Berlini ka theksuar domosdoshmërinë e vazhdimit të bashkëpunimit të ngushtë ndërkombëtar dhe përparimit të dukshëm në dialogun me Serbinë, duke theksuar zbatimin e marrëveshjeve të Brukselit dhe Ohrit.

“Nevojitet besim i ndërsjellë dhe bashkëpunim i vazhdueshëm. Gjermania mbetet e bindur se qeveria e ardhshme do të forcojë koordinimin me partnerët ndërkombëtarë dhe do të punojë për realizimin sa më të shpejtë të perspektivës evropiane të Kosovës”, thuhet në deklaratën zyrtare.

Edhe Ambasada e Mbretërisë së Bashkuar ka shprehur pritjet e saj, duke theksuar rëndësinë e përfshirjes së komunitetit serb dhe përkushtimin në dialogun me Beogradin. “Shpresojmë që Qeveria e ardhshme e Kosovës të adresojë nevojat e të gjithë qytetarëve dhe të angazhohet fuqishëm për normalizimin e marrëdhënieve me Serbinë”, tha ambasada britanike.

Mbretëria e Bashkuar gjithashtu shprehu mbështetjen pa rezerva për anëtarësimin e Kosovës në Këshillin e Evropës, por nënvizoi se për këtë janë të nevojshme reforma dhe respektim i standardeve ndërkombëtare.