“Pranimi i Kosovës në Këshillin e Evropës është vonuar vetëm për shkak se Kurti ka refuzuar të plotësojë kushtin minimal – të paktën të dërgojë një dokument të asociacionit në Gjykatën Kushtetuese të Kosovës –  tha kreu i Qendrës Serbe, Zdravko Ponoš.

Siç ka theksuar në postimin e tij në rrjetin social X, këto veprime të Albin Kurtit janë të pëlqyera për votuesit e tij dhe Beogradi këtë e sheh si sukses diplomatik.

“Ai mundet ta bëj, dhe votuesve të tij i pëlqen loja e vështirë dhe e rëndë. Partneri I tij në Beograd, Aleksander Vuçiç e ‘shet’ këtë si sukses diplomatik. Lajmet e rreme i kënaqin edhe votuesit e tij” – ka shkruar Ponoš.

Kujtojmë se Kryeministri i Kosovës, Albin Kurti është takuar me ambasadorët e shteteve të QUINT-it dhe shefin e zyrës së Bashkimit Evropian në Kosovë, Tomas Szunyog, me të cilët ka diskutuar për largimin e masave ndëshkuese të BE-së ndaj Kosovës.

“Kryeministri theksoi dhe nevojën që BE-ja të heqë sa më shpejt masat ndëshkuese, pasi arsyet për të cilat janë vendosur kanë pushuar së qeni qysh në shtatorin e vitit të kaluar, kur qeveria ka bërë veprimet në krijimin e bazës ligjore për mundësimin e procesit të zgjedhjeve të parakohshme në katër komunat në veri të Kosovës”, thuhet në një komunikatë dërguar mediave.

Theksojmë se edhe presidentja e Kosovës, Vjosa Osmani, gjatë kësaj jave është takuar me ambasdorët e QUINT-it, dhe si Kurti, ajo ka theksuar nevojën imediate të heqjes së masave të BE-së.

Kjo pasi sipas saj të njëjtat, “janë të padrejta dhe krijojnë mungesë ekuilibri në dialog, si dhe njëkohësisht theksoi se Kosova ka ndërmarr hapa konkret në përputhje me planin e dakorduar për këtë çështje”.

Politologu spanjoll nga Grupi Këshillimor i Politikave ‘Ballkani në Europë’, Alehandro Perez, në një emision televiziv ka folur mbi anëtarësimin e Kosovës në KiE.

Ai komentoi edhe qëndrimet e Spanjës, e cila vazhdon që të jetë kundër pranimit të Kosovës në Këshillin e Evropës, apo avancimit në anëtarësime ndërkombëtare.

Perez tregoi se si mund ta bindë Kosova Spanjën që ta ndryshojë qasjen.

Së pari, ai tha se shteti spanjoll nuk do njohë Kosovën derisa të arrihet një marrëveshje me Serbinë.

“Për autoritetet spanjolle, pavarësisht se kush ka qenë në qeveri, qëndrimi ka qenë gjithmonë shumë i qartë. Spanja nuk do ta njohë Kosovën derisa të arrihet një marrëveshje me Serbinë. Dhe ky ka qenë qëndrimi tradicional i Madridit zyrtar gjatë viteve, i mbështetur kryesisht në besimin e Spanjës se, ekzistenca e një Kosove të pavarur në ditët e sotme shkel ligjin ndërkombëtar. Pra, ky është në thelb konteksti, politik dhe ligjor, në të cilit po mbështetet Spanja” – u shpreh politologu spanjoll.

Ndër të tjera, Perez nuk e përkrahu vendimin e Spanjës për bllokimin e qasjes së Kosovës në Këshillin e Evropës.

“Që Spanja të votonte pro antarësimit, do të duhej të ndodhin më shumë zhvillime në lidhje me raportet dhe marrëveshjet e Kosovës me Serbinë. Megjithatë, mendoj se qëndrimi aktual i qeverisë spanjolle për bllokimin e qasjes së Kosovës në Këshillin e Evropës” –  tha ndër të tjera Alehandro Perez.

Gabriel Escobar nuk do të mbajë më postin e të dërguarit special të Shteteve të Bashkuara të Amerikës për Ballkanin Perëndimor. Ai u largua nga ky post në mënyrë të turbullt, mes shkrimeve të gazetave se neutraliteti i tij ishte vënë në pikëpyetje për shkak të lidhjeve financiare të gruas së tij me Ministrinë e Punëve të Jashtme të Serbisë dhe mohimeve nga Departamenti i Shtetit. Pozicioni i ri në të cilin do të caktohet Escobar, nëse caktohet, sipas bashkëbiseduesve të medias serbe ‘Nova’, do t’i përgjigjet pyetjes nëse ka ndonjë të vërtetë në akuzat.
Lajmi se Gabriel Escobar largohet nga posti aktual erdhi nga portali Frontliner, me disa akuza shumë të rënda ndaj të dërguarit në largim të SHBA-së për Ballkanin Perëndimor.
Në tekstin e tyre ndër të tjera thuhet se veprimet e Escobarit në Kosovë janë të njëanshme dhe potencialisht të komprometuara, duke pasur parasysh lidhjet financiare mes gruas së tij dhe Ministrisë së Punëve të Jashtme të Serbisë. Kjo, siç shkruan Frontliner më tej, hedh hije mbi neutralitetin dhe paanshmërinë e të dërguarit ndërkombëtar dhe ngre dyshime për veprimet e tij gjatë ngjarjeve kritike në Kosovë, siç ishte kriza e qershorit dhe gushtit 2023.

Frontliner shkroi gjithashtu për lidhjet familjare të Gabriel Escobar dhe Manuel Escobar, partnerë në një firmë, e cila dyshohet se ka një kontratë me Qeverinë e Republikës Srpska për këshilla dhe përfaqësim në çështjet ligjore ndërkombëtare.

Departamenti i Shtetit lëshoi mohimin pothuajse menjëherë. Mirëpo, në të nuk e mohojnë që Escobar nuk do të jetë më i dërguari për Ballkanin Perëndimor, por pretendojnë se nuk bëhet fjalë për ndryshim, por për një “rotacion” dhe duhet të kalojë në detyrën tjetër.

“Të gjithë diplomatët e karrierës jashtë vendit ndërrohen çdo një deri në katër vjet, që është një praktikë e rregullt. Escobar ka qenë në postin e tij aktual për tre vjet dhe është planifikuar të kalojë në detyrën e tij të radhës në javët në vijim.

Deri në tranzicionin e planifikuar, ai mbetet në pozitën e Zëvendës Ndihmës Sekretarit në Zyrën për Çështje Evropiane dhe Euroaziatike, si dhe i Dërguari Special për Ballkanin Perëndimor”- thuhet në reagimin e Departamentit të Shtetit, I cili mohon akuzat e lartpërmendura për lidhjet financiare të familjes së tij me Ministrinë e Brendshme të Serbisë dhe Qeverinë e Republikës Srpska.

“Gruaja e zëvendësndihmës sekretarit Escobar nuk ka marrë asnjëherë mjete nga Ministria e Punëve të Jashtme të Serbisë. Gjithashtu, Zëvendës Ndihmës Sekretari i Shtetit i SHBA-së nuk ka asnjë lidhje familjare me partnerin e supozuar në firmën ligjore nga Teksasi” – thekson Departamenti i Shtetit.
Ish-diplomati serb, Srećko Gjukiç tha se është befasi që emri i një diplomati profesionist dhe bashkëshortes së tij lidhen me histori të tilla dhe pohoi se histori të tilla qarkullojnë në Beograd për një kohë të gjatë.

“Dhe jo vetëm për Escobarin, por edhe për shumë zyrtarë të tjerë të huaj që kthehen nga Beogradi me xhepa plot para. Në qarqet e njerëzve që merren seriozisht me analizën e politikës dhe diplomacisë, realisht ndonjëherë nuk është e mundur të gjendet një shpjegim adekuat për politikën e butë që shpesh ndiqet ndaj Serbisë. Pavarësisht disa ngjarjeve, premtimeve të parealizuara dhe qëndrimeve të shpeshta që bien ndesh me ato të BE-së dhe SHBA-së. Ka qëndrime shumë të ndryshme për interpretimin e disa gjërave që po ndodhin në Serbi, prej ambasadorit amerikan Christopher Hill dhe Departamentit të Shtetit. Dhe e gjithë kjo është vërtet shumë e pazakontë” – deklaroi Gjukic për Nova.

“Unë personalisht nuk do të habitesha nëse këto pretendime janë të vërteta, pavarësisht nga mohimi i Departamentit të Shtetit. Për hir të dinjitetit të tij dhe të diplomacisë amerikane, Departamenti i Shtetit sigurisht që nuk do të shkojë më tej në deklarata. Do të shohim kur të caktohet në një detyrë të re, nëse kjo do të ndodhë vërtet, çfarë dënimi do t’i jepet atij dhe sa të sakta janë këto akuza” – theksoi diplomati Gjukic.

Kujtojmë se Escobar u emërua në postin e të dërguarit të SHBA-së për Ballkanin Perëndimor në vitin 2021, duke zëvendësuar Matthew Palmer. Sipas pretendimeve të analistëve në Uashington në atë kohë, emërimi i tij ishte tregues se Shtëpia e Bardhë nën komandën e Biden vendosi për një rol më energjik dhe proaktiv në Ballkan.

“Ai është një njeri që kryen detyrat që i janë besuar dhe gjen zgjidhje, duke i imponuar ndonjëherë edhe diplomatikisht” – thoshin për të në atë kohë.

“Mbulimi i Serbisë nga mediat perëndimore nuk mund të krahasohet me situatën e viteve 1990 për Kosovën, por vëren se “formula e vjetër” mbetet dhe se qëndrimi i përgjithshëm nuk ka ndryshuar, pavarësisht se Serbia dhe çështja e Kosovës nuk janë më në krye të agjendës së Perëndimit” – kështu është shprehur gazetarja serbe Liljana Smajlović, dhe sipas saj, formula e vjetër nënkupton dy gjëra.

“Ballkanizmi, pra ne jemi ballkanasit, popuj që shkojmë shpejt në regresion, në urrejtje shekullore, etj. Një konstante tjetër është se ‘serbët bënë gjenocid, ata janë maniakë gjenocidalë. Ne për Perëndimin jemi ‘zezakë’ dhe ky qëndrim i përgjithshëm nuk ka ndryshuar, pavarësisht se rrallë interesi duket se inkurajon ndonjë redaksi të interesohet për njerëzit në veçanti në Serbi dhe në përgjithësi në Ballkan” – deklaroi Smajlović duke shtuar se më së shpeshti ka fluks të parave të lobimit shqiptar apo boshnjak.

Për gazetaren serbe, edhe në rastet kur raportohet për Serbinë, është interesimi i madh i dikujt, si përshembull politikanes britanike Alicia Kearns.

“Unë do të thosha se ajo është arsyeja pse disa media britanike herë pas here kanë kritika të ashpra ndaj Serbisë. Sipas tyre, për gjithçka që ndodh në Ballkan, fajin e kanë serbët” – theksoi Smajlović duke shtuar se kjo tendencë vihet re edhe tek disa persona, profesorë, ekspertë të organizatave joqeveritare.

“Jasmin Mujanoviç, është shumë aktiv në Twitter, ato janë formulat më të thjeshtuara, të gjitha bardh e zi. Ai është burimi dhe mbështetësi i tezave shumë tezave të rreme, si psh se Serbia po blen një numër të madh të dronëve iranianë, kështu që ajo është e rrezikshme, mund të sulmojë Kosovën dhe tashmë po destabilizon edhe Bosnje Hercegovinën. Kurse kur bëhet fjalë për mediat amerikane, ato as nuk janë të interesuara për atë që po ndodh, përveç disa përballjeve me kundërshtarët politikë” – deklaroi gazetarja serbe.

“Trump në fakt nuk ka media, ai ka disa rrjete sociale, ku Richard Grenell është me shumë ndikim, dhe kjo është vërtet e dobishme për Serbinë, ndryshe nga çfarë po bëjnë tani “Biden dhe europianët” – potencoi Liljana Smajlović.

Ajo gjithashtu tha se përjashtim në mediat gjermane bën Mihael Martens, i cili siç u shpreh gazetarja, e njeh shumë mirë rajonin dhe gjuhën.

“Ai lexon çdo gjë dhe kudo që gjen ndonjë informacion, i fryn dhe i jep rëndësinë maksimale. Kështu ai dëshmoi se nuk është e vërtetë që serbët po largohen nga Kosova, dhe nëse ata po largohen, nuk është për shkak të presionit ndaj serbëve. Ai aktualisht po lufton tmerrësisht që Kosova të anëtarësohet në Këshillin e Evropës, dhe që asociacioni të mos jetë kusht” – theksoi Smajlović, sipas së cilës Martens është një nacionalist tipik gjerman, paksa i djathtë, “që i pëlqen të ketë kafshë shtëpiake, këto janë të preferuarat e tij në Ballkan”.

Smajloviç gjithashtu hoqi paralele me fillimin e viteve nëntëdhjetë, kur Gjermania donte të njihte Kroacinë dhe Slloveninë, por vendet e tjera nuk deshën.

“Francezët dhe anglezët ishin mjaft skeptikë, por Gjermania ishte në Mastriht, kur u krijua BE, ata bënë lëshime të ndryshme në mënyrë që Anglia dhe Franca të binin dakord për politikën gjermane në Ballkan. Pra, vetëm Gjermania u interesua vërtet, Franca dhe Anglia janë teorike, ishin më shumë në anën tonë, sepse dikur ishim aleatë, por sapo gjetën ndonjë interes të madh, na hodhën poshtë si krejtësisht të parëndësishëm. Diçka e ngjashme po ndodh sot” – deklaroi Liljana Smajlović, sipas se cilës, megjithatë mbulimi i mediave perëndimore në vitet nëntëdhjetë dhe kjo tani nuk mund të krahasohen.

“E dini kur mund të shihni se ka ndonjë interes dhe plan real të rëndësishëm? Kur ka lidhje me Kosovën si në vitin 2004, kur statusi ishte i pazgjidhur dhe politika e standardeve para statusit ishte e vlefshme. Kur pasuan një breshëri artikujsh dhe çdo javë botohej një artikull nga ndonjë ekspert, kundër Serbisë. Nuk ishte produkt i parave të shqiptarëve, edhe pse ndoshta paratë dhe lobimi shqiptar ndihmuan. Ishte vendim i Departamentit të Shtetit” – theksoi gazetarja serbe.

Ministrja e Punëve të Jashtme dhe Diasporës në Kosovë, Donika Gërvalla, ka njoftuar sot se Rusia aktualisht po kryen një sulm hibrid ndaj Kosovës.

Gërvalla, përmes një postimi në rrjetin social “X”, tha se sulmi hibrid rus ndaj Kosovës ka ardhur pas njoftimit të Kosovës se do të mbështesë me pajisje ushtarake Ukrainën

“Rusia po e sulmon Kosovën në një mënyrë hibride sot, pas njoftimit tonë për mbështetje me pajisje ushtarake për Ukrainën, në mbrojtjen e saj të justifikuar kundër agresionit gjenocidal rus. Ne e dimë nga gjenocidi i Serbisë ndaj Kosovës se vetëm mjetet ushtarake e ndalin gjenocidin”, ka shkruar Gërvalla

Hakerët rusë kanë sulmuar faqet e institucioneve të Kosovës, të cilat gjatë ditës nuk kanë qenë në funksion. Sipas njoftimit nga qeveria, shënjestër e sulmeve kanë qenë faqja e Presidencës dhe Kryeministrisë.