Putin nuk tërhiqet/ Sulmi masiv i Rusisë me dronë në ‘zemër’ të Ukrainës, rritet numri i viktimave në Kiev

Numri i të vdekurve nga sulmi masiv me dronë dhe raketa i nisur nga Rusia në Kiev gjatë natës po rritet në mënyrë dramatike.

Sipas përditësimit të fundit zyrtar, të paktën 18 persona, përfshirë katër fëmijë, kanë humbur jetën, me Presidentin ukrainas Volodymyr Zelensky që akuzon Moskën se preferon të vazhdojë të “vrasë” në vend që të negociojë një marrëveshje paqeje.

“Rusia zgjedh raketat balistike në vend të tryezës së negociatave”, tha Zelensky për X, duke bërë thirrje për sanksione të reja kundër Rusisë. “Ajo zgjedh të vazhdojë të vrasë në vend që t’i japë fund luftës.”

Në të njëjtën kohë, presidenti ukrainas theksoi se Kievi pret “reagimin” e të gjithë botës, kryesisht vendosjen e sanksioneve të reja ndaj Rusisë. Ai i bëri thirrje konkretisht Kinës, një aleate e Moskës, dhe Hungarisë, një shtet anëtar i BE-së me lidhje të ngushta me Rusinë, që të mbajnë një qëndrim të qartë.

Sulmet dëmtuan misionin e Bashkimit Evropian dhe zyrat e Këshillit Britanik në qytet, thanë zyrtarët. Bashkimi Evropian dhe Londra thirrën të dërguarit rusë për të protestuar. Nuk pati raportime për viktima në asnjërën prej tyre.

Kryebashkiaku i Kievit, Vitali Klitschko, e përshkroi sulmin si një nga më të mëdhenjtë në qytet në muajt e fundit. Të paktën 38 persona u plagosën në sulmin që zgjati disa orë dhe që dëmtoi ndërtesa në të gjitha lagjet e qytetit, thanë zyrtarët.

Sulme ruse në 13 vende të ndryshme

Në të gjithë vendin, ushtria ukrainase tha se sulmet ruse goditën 13 vende. Operatori kombëtar i rrjetit elektrik Ukrenergo tha se u goditën objekte energjitike, duke shkaktuar ndërprerje të energjisë elektrike.

Në total, gjatë natës nga e mërkura në të enjte, Rusia lëshoi ​​598 dronë dhe 31 raketa kundër Ukrainës, sipas Forcave Ajrore të Ukrainës.

Ushtria ukrainase tha se mbrojtja ajrore ukrainase rrëzoi 563 nga gati 600 dronë dhe 26 nga 31 raketa të qëlluara nga Rusia në të gjithë vendin.

Një sulm dëmtoi një kryqëzim hekurudhor në rajonin e Vinnytsia në Ukrainën qendrore, ku zyrtarët thanë se një sulm ndaj infrastrukturës kritike la 60,000 banorë pa energji elektrike.

Zyrtarët ukrainas kanë paralajmëruar se Rusia do të intensifikojë sulmet ndaj rrjetit energjetik të vendit ndërsa afrohet dimri. Forca e dronëve të Ukrainës tha se goditi rafineritë e naftës Afipsky dhe Kuibyshevsky si pjesë e këtij sulmi.

Rusia shtoi se forcat e saj përdorën një motoskaf pa pilot për të goditur dhe fundosur një anije zbuluese ukrainase të enjten në grykëderdhjen e lumit Danub.

Dmytro Pletchuk, një zëdhënës i marinës ukrainase, tha se sulmi vrau një person dhe disa të tjerë u plagosën ose rezultuan të zhdukur. Ai nuk komentoi për vendndodhjen e sulmit.

Portet e Danubit janë jashtëzakonisht të rëndësishme për Ukrainën, duke vepruar si një alternativë ndaj porteve të Detit të Zi, përmes të cilave importohen karburante dhe ngarkesa të tjera kritike në vend.

Rusia tha se sulmi i saj goditi objekte ushtarake-industriale dhe baza ajrore dhe se Ukraina kishte sulmuar gjithashtu objektiva ruse. Kremlini tha se mbetej i interesuar në vazhdimin e bisedimeve të paqes.