Rama ironizon keq Berishën: Të punësosh LaCivita e të mendosh se bëhesh Trump është si të marrësh një parukier e të bëhesh Brad Pitt

Kryeministri socialist Edi Rama siguroi një shumicë të rehatshme në zgjedhjet parlamentare të Shqipërisë.

“Është përvoja më përulëse e jetës sime — dhe vjen në një moment historik për Shqipërinë… si një shtet anëtar i ardhshëm i Bashkimit Evropian,”- tha Rama për POLITICO, i cili premtimin për anëtarësim në BE deri në vitin 2030 e bëri një aspekt kyç të fushatës së tij.

Partia Socialiste duket se ka siguruar një shumicë dërrmuese me rreth 82 vende — shumë më tepër se 71 të nevojshme për të qeverisur e vetme në parlamentin me 140 vende të Shqipërisë. Edhe pse Shqipëria ka një sistem shumëpartiak, pushteti në fakt është alternuar midis dy forcave kryesore — socialistëve dhe Partisë Demokratike të qendrës së djathtë — që nga rënia e komunizmit në fillim të viteve 1990.

Fakti që demokratët kishin punësuar Chris LaCivitën, një maestro të fushatës republikane i cili organizoi fitoren rikthyese të Donald Trump në zgjedhjet amerikane të vitit 2024, nuk dukej se e shqetësoi Ramën.

“Të punësosh LaCivitën dhe të mendosh se mund të bëhesh Trump është si të punësosh një parukier në Hollywood dhe të mendosh se do të bëhesh Brad Pitt”, tha Rama.

Ai i vuri në dyshim demokratët për besimin se “vetëm pse dikush punonte për Trumpin, ai mbart një lloj fuqie magjike të Trumpit në shoqëri… sidoqoftë, ishte një komedi që ia vlente ta shihje”.

Votat ende po numërohen dhe rezultatet e plota paraprake priten të martën, por me mbi 85 përqind të numëruar, rezultati nuk ka gjasa të ndryshojë ndjeshëm. Kryeministri, i cili është shumë i aktiv në mediat sociale, e kaloi pjesën më të madhe të së hënës duke postuar rastësisht nga Shtëpia e Evropës në Tiranë, ku përgatitjet janë në kulmin e tyre për samitin e Komunitetit Politik Evropian që do të fillojë më vonë këtë javë. Presidentja e Komisionit Evropian, Ursula von der Leyen, dhe Presidenti i Këshillit Evropian, António Costa, do të udhëtojnë për në Shqipëri për edicionin e gjashtë të samitit — një iniciativë e nisur nga Presidenti francez Emmanuel Macron për të bashkuar vendet e BE-së dhe ato jashtë BE-së për bisedime mbi sigurinë, bashkëpunimin ekonomik dhe stabilitetin rajonal. Gjithashtu të pranishëm do të jenë përfaqësues të vendeve të tjera që shpresojnë të bashkohen me BE-në, si Ukraina dhe Gjeorgjia.

“Është një nder i madh të mirëpresim të gjithë kontinentin tonë demokratik në Tiranë — përfshirë Ukrainën dhe mikun tim të dashur Volodymyr Zelenskyy,”- tha Rama. I pyetur nëse Shqipëria kishte ndonjë këshillë për Ukrainën, e cila është aspirante për në BE, Rama theksoi statusin unik të Ukrainës në procesin e pranimit.

“Shqipëria nuk pretendon t’i japë mësime Ukrainës. Përkundrazi, ne mund të mësojmë vetëm nga Ukraina — nga çmimi që populli i saj është i gatshëm të paguajë për rrugën e tij drejt Perëndimit dhe Bashkimit Evropian,”- tha ai.

Rama ia del mbanë duke luajtur rolin e mikpritësit dashamirës ndaj udhëheqësve perëndimorë dhe duke përforcuar premtimin e tij kryesor zgjedhor se ai është i vetmi person që mund ta çojë Shqipërinë në prag të anëtarësimit në BE brenda 5 vitesh. Ndërkohë, partia kryesore e opozitës, demokratët — të cilët duket se kanë siguruar rreth 52 vende në parlament — ia hodhën fajin për rezultatin asaj që e quajtën kontroll të rrënjosur të Partisë Socialiste mbi institucionet dhe përpjekjeve për të ndikuar te votuesit.

“Nëse dhjetëra mijëra njerëz punësohen në këmbim të votës së tyre… nëse qendrat e votimit janë të rrethuara nga besnikë të partisë nga të gjitha anët… atëherë ne e dimë se si t’i quajmë këto zgjedhje,”- tha në një deklaratë kreu i Partisë Demokratike, Sali Berisha.

Duke shpresuar të organizojë një rikthim politik të ngjashëm me rikthimin e Trump në vitin 2024, Partia Demokratike e qendrës së djathtë e Shqipërisë angazhoi strategenin e fushatës së Trump, LaCivita, për të ndihmuar në hartimin e mesazhit të tyre dhe në drejtimin e fushatës.

LaCivita i përforcoi pretendimet e Berishës për manipulim zgjedhjesh në një postim në X, duke ndarë një video nga kanali lokal i lajmeve Syri TV në lidhje me një zyrë të dyshuar për blerje votash të Partisë Socialiste të vendosur pranë një qendre votimi në Tiranë.

“Ja si duket vjedhja e votave në Shqipëri… me mirësjellje të narkoqeverisë së Edie Ramës,”- thuhej në postimin e LaCivitës .

Misioni i monitorimit të zgjedhjeve i Organizatës për Siguri dhe Bashkëpunim në Evropë tha të hënën se zgjedhjet u zhvilluan në një mënyrë gjithëpërfshirëse dhe transparente, por vuri në dukje se qëndrimi i gjatë i Partisë Socialiste në qeveri “krijoi një avantazh të padrejtë.”

Por për Ramën, i cili po shijon fitoren e tij, vetëm një gjë ishte e rëndësishme: ndjenja e votuesve.

“Ata kanë dërguar një mesazh të fuqishëm dhe të thjeshtë: ‘Ne duam të arrijmë më në fund lartësinë e vendeve të Bashkimit Evropian — dhe mund ta bëjmë këtë vetëm me ju dhe me Partinë Socialiste!’”

Marrë nga Politico