Rama: SHBA ka një borxh për të larë, reagon Basha

Kryeministri Edi Rama u shpreh se Shtetet e Bashkuara të Amerikës janë në borxh me Shqipërinë për strehimin e MEK. I ftuar në Real Story, ai tha se strehimi i MEK ka sjellë pasoja për vendin, si sulmi kibernetik nga iranianët dhe se SHBA-të ua kanë borxh shqiptarëve këtë gjë.

“Aleancat nuk janë menu që të pëlqen të marrësh pjatën e parë dhe jo të dytën. Ke detyrimet e tua dhe momentet kur e bën veten të vlefshëm për aleatët e tu më të mëdhenj. Ne ofrojmë shtëpinë tonë, ata duhet të garantojnë jetesën e tyre dhe ju duhet të garantoni sigurinë. Sot është e qartë se ne kemi bërë tonën, ata kanë mbrojtur veten, ndërsa aleatët tanë kanë një borxh për të larë me ne. Sepse duhet ta themi këtë gjë, ta themi troç, ka një borxh për të larë me ne. Do shohim, do u vijë koha e do shohim se si do e lajnë këtë borxh,”- tha Rama. 

…

Pas deklaratave të kryeministrit Edi Rama se aleatët tanë SHBA- kanë një borxh për të larë për Shqipërinë, duke ju referuar strehimit të anëtarëve të opozitës iraniane në kampin MEK, ka reaguar ish-kryetari i partisë Demokratike Lulzim Basha.

Sipas Bashës, aleatët tanë strategjikë SHBA nuk kanë asnjë borxh nga ndesh, ndërsa sipas ish-kryetarit të PD-së ne nuk lajmë dot kurrë borxhin ndaj tyre për Shqipërinë e pavarur, të çliruar nga komunizmi dhe në NATO, për çlirimin dhe pavarësinë e Kosovës dhe për të drejtat e shqiptarëve në RMV e kudo. Basha nënvizon se sot Shqipëria ende nuk ka plotësuar standardet të partneritetit dhe aleancës strategjike mes SHBA-së, siç janë shteti i së drejtës, media e lirë, konkurrenca e ndershme dhe lufta kundër korrupsionit dhe krimit të organizuar.

‘Aleatët tanë strategjikë SHBA nuk kanë asnjë borxh ndaj nesh, ndërsa ne nuk lajmë dot kurrë borxhin ndaj tyre për Shqipërinë e pavarur, të çliruar nga komunizmi dhe në NATO, për çlirimin dhe pavarësinë e Kosovës dhe për të drejtat e shqiptarëve në RMV e kudo. Shteti i së drejtës me barazi para ligjit për të gjithë, demokracia funksionale dhe media e lirë, konkurenca e ndershme dhe liria e tregut, lufta kundër korrupsionit dhe krimit të organizuar janë standartet ende të paplotësuara të partneritetit dhe aleancës strategjike mes SHBA-së dhe Shqipërisë.’- shkruan Basha.