SAMITI/ Rama pret të ftuarit me tapet të kuq

Kanë mbërritur të ftuarit e parë në samitin BE- Ballkani Perëndimor që po zhvillohet sot në Tiranë.

Deri më tani Rama ka pritur homologun e tij maqedonas, kryeministrin Dimitar Kovacçski, Komisionerin Evropian për Zgjerimin e BE-së, Oliver Varjeliy, dhe presidenten e Kosovës Vjosa Osmani.

Tha se nuk do të vinte në Samit, Vuçiç shfaqet i buzëqeshur krah Ramës në Tiranë

Ka mbërritur në Tiranë, presidenti serb Aleksandër Vuçiç.

Ai është pritur me buzëqeshje nga kryeministri Rama.

“Kosova do të paraqesë në fund të vitit aplikimin për anëtarësim në BE”, Osmani nga Tirana: Evropa të lëvizë nga fjalët në vepra

Presidentja e Kosovës Vjosa Osmani ka mbërritur në Tiranë në kuadër të Samitit BE-Ballkani Perëndimor. Presidentja i bëri thirrje BE-së që të lëvizë nga fjalët në vepra për sa i përket liberalizimit të vizave të Kosovës dhe bëri me dije se në fund të vitit Kosova do të paraqesë aplikimin për tu anëtarësuar në BE.

Osmani: Jam shumë e lumtur që gjendem në Tiranë, shpresoj që konkluzionet dhe deklarata do të shfaqin këtë përbashkësi të BE drejt një procesi të përshpejtuar drejt BE. Jam këtu si përfaqësuesja e vendit më pro evropian që ekziston. Na duhet që BE-ja të lëvizë nga fjalët në vepra sidomos kur bëhet fjalë për liberalizimin e vizave për Kosovë. Kosova do të paraqesë në fund të këtij viti aplikimin për anëtarësim në BE.

Osmani theksoi se ky është një takim mes BE dhe Ballkanit Perëndimor dhe nuk është vendi për dialog dhe negociata me s Kosovës dhe Serbisë.

TIRANË – Kjo e martë është një ditë e shënuar për Shqipërinë dhe rëndësinë e saj në rajon, por edhe më gjerë. Sot në kryeqytet do të mbahet takimi i nivelit të lartë mes udhëheqësve të Bashkimit Evropian dhe vendeve të Ballkanit Perëndimor.

Zgjerimi i BE në Ballkanin Perëndimor duket se është kthyer në një çështje primare të bllokut, kjo për shkak të agresionit të Rusisë mbi Ukrainë dhe rritjes së tensioneve.

Ky takim do të jetë një ditor, ndërsa vetë kryeministri Edi Rama e ka cilësuar si një moment historik për vendin tonë. Rama shtoi se takimi njëditor është tregues i interesit gjeostrategjik që Evropa ka ndaj rajonit. Megjithatë i pari i qeverisë nuk i ka kursyer edhe kritikat për BE, për zvarritjen e procesit të zgjerimit. Vendet e Ballkanit Perëndimor janë përballuar prej vitesh me një ngecje të këtij procesi.

Në të njëjtën ditë që mbahet takimi i nivelit të lartë mes udhëheqësve të BE-së dhe atyre të Ballkanit Perëndimor, opozita ka paralajmëruar organizimin e një proteste. Ish-kryeministri Sali Berisha, i cili ka rimarrë kontrollin e Partisë Demokratike, deklaroi sot se manifestimi organizohet në mbrojtje të vlerave europiane, të cilat sipas tij, po rrezikohen dhe po kërcënohen nga kreu i qeverisë.

“Nesër është dita e qytetarëve që aspirojnë për liri, dinjitet dhe transparencë. Është dita e shqiptarëve që besojnë se Shqipëria është një tokë e bekuar, që me mirësitë dhe rezervat e saj, mund të begatojë kombin. Me kushtin e vetëm, të ketë një qeverisje demokratike. Me kushtin e vetëm të ketë një qeveri të palidhur me krimin, siç është qeveria e Edi Ramës”, tha zoti Berisha.

Opozita ka kërkuar që të protestojë përpara Kryeministrisë. Por kjo kërkesë është hedhur poshtë nga policia, sipas së cilës kjo zonë është pjesë e perimetrit të sigurisë për takimin e nivelit të lartë.