Serbët protestojnë, kreu i Zubin Potokut: Nuk jap dorëheqje

Protestat masive dhe të dhunshme të serbëve në Mitrovicën e Veriut nuk i kanë friksuar aspak kryekomunarët shqiptar. Serbët, Vuçiç dhe ndërkombëtarët kërkojnë zgjedhje të reja pasi votimet u bojkotuan nga shumica serbe dhe morën pjesë vetëm shqiptarët.

Tentativa këto që do të kënaqnin protestuesit serbë dhe do të qetësonin sipas ndërkombëtarëve tensionet e krijuara. Ndaj kryetarëve të komunave po ashtu u kërkua edhe që ata të jepnin dorëheqjen e mos të kryenin detyrën e caktuar nga zgjedhësit.

Mirëpo për kryetarin e ri të Zubin Potokut, Izmir Zeqirin, kërkesat e serbëve dhe ndërkombëtarëve nuk janë të arsyeshme. Ai rrëfen se edhe pse ka një presion të madh, nuk e mendon të japi dorëheqjen dhe t’ua dorëzojë mandatin serbëve.

“Për momentin nuk kemi ndonjë bisedë rreth kësaj në nivelin e qeverisë, ministrisë së pushtetit lokal ose qoftë nga kabineti i presidentes. Ne duhet të kemi një analizë të studiuar pak më gjerë se përse ne duhet të japim dorëheqjen. Për momentin nuk mendoj për atë çështje. Nuk shoh që ideja e zgjedhjeve të reja do të prodhojë diçka më mirë. Duhen studiuar arsyet pse duhet të tërhiqemi, pse duhet të ketë zgjedhje të reja. Duhet të ketë baza të arsyeshme e më pas të veprohet” – tha kryetari i Zubin Potokut.