Serbia po shkon drejt territorializimit të çështjes serbe/ Flet Biserko

“Rasti Banjska në fakt tregoi se potenciali për konflikt është i madh” – Kështu tha Sonja Biserko, themeluese dhe presidente e Komitetit të Helsinkit për të Drejtat e Njeriut në Serbi, në një intervistë për Geopost, duke shtuar se ngjarja atje tregoi se operacioni ishte shumë më i gjerë, por për fat, duke u penguar, u parandalua gjakderdhja dhe konflikti i gjërë.

Biserko beson se Kosova është një pikë përtej së cilës Perëndimi nuk do të tolerojë asnjë aktivitet të Serbisë apo Rusisë.

“Nuk është vetëm çështja e Serbisë dhe e ‘botës serbe’, por është çështje e ndërthurjes së të paktën dy interesave, atyre amerikane dhe evropiane” – potencoi Biserko, sipas së cilës, Rusia është e vetmja që është dukshëm e pranishme dhe ka potenciale të lëviz gjëra që do çonin në tensione dhe konflikte edhe në Malin e Zi dhe Bosnje Hercegovinë.

Serbia, thekson ajo, nuk e ka mbyllur çështjen serbe dhe ende ekziston një rrymë që tenton të rishikojë humbjet e luftës nga vitet 1990.

Biserko vlerëson se në Republikën Srpska ekziston një rrjet grupesh kriminale dhe gangsterësh që janë shumë të fuqishëm ekonomikisht por edhe janë të armatosur.

“Është një ushtri e fuqishme që mund të jetë shumë e dobishme në situatat që mund të krijohen prej provokimeve, domethënë kur dikush vendos t’i përdorë ato.” – theksoi Biserko duke u shprehur gjithashtu se Rusia po kërkon një mënyrë për t’i dhënë fund luftës në Ukrainë me një lloj marrëveshjeje të re të Dejtonit.

Edhe Beogradi edhe Rusia, vlerësoi Biserko, presin ndryshime të mundshme vitin e ardhshëm, veçanërisht në Shtëpinë e Bardhë.

“Vizita e Sekretarit të Përgjithshëm të NATO-s në Serbi ishte shumë domethënëse, por konferenca për shtyp e Vuçiç dhe Stoltenberg, tregoi se mes të dyve, në prapaskenë ishte zhvilluar një bisedë shumë serioze, dhe kjo u pa qartë te gjuha e trupit e Vuçiç” – u shpreh Biserko.

E pyetur për propozimin e Kryeministrit Edi Rama, që formati i ardhshëm i takimit të NATO-s të bëhet me praninë e vendeve të tjera të Ballkanit Perëndimor që nuk janë anëtare të Aleancës, Biserko deklaroi:

“Ky është një rajon që nuk është thelbësisht gati dhe nuk ka ende potenciale për të hyrë tani në Bashkimin Europian. Mendoj që hapi I pare pozitiv do ishte antarësimi I tyre në NATO, sa më shpejt të jetë e mundur. Për mendimin tim, ky është thjesht një nga prioritetet kur bëhet fjalë për Ballkanin Perëndimor” – Potencoi Sonja Biserko.