Serbisë i pezullohen vizat për në BE

HAGË– Më 8 dhjetor, Dhoma e Përfaqësuesve të Holandës miratoi një rezolutë, që i bën thirrje qeverisë së saj që të lobojë në Bruksel për pezullimin e përkohshëm të regjimit pa viza për Serbinë, nëse Serbia nuk përputhet me politikën e vizave dhe të jashtme të BE-së.

Një ditë para inicimit të rezolutës në parlament, Sekretari i Shtetit për Drejtësi dhe Siguri, Erik van der Burg, iu përgjigj pyetjeve parlamentare të Van Wijngaarden për shtimin e migrimit nëpër Serbi. Ai tha se qeveria “ndan shqetësimin e komisionerit evropian Johansson për rritjen e fluksit përmes Serbisë dhe sheh nevojën për të kundërshtuar rrjedhën përmes Ballkanit Perëndimor”, por gjithashtu mirëpret hapat e ndërmarra nga Serbia në drejtim të harmonizimit me politikën e vizave të BE-së dhe do të vazhdojë për të monitoruar zhvillimin e situatës dhe për të ushtruar presion nëse është e nevojshme.

Në sistemin institucional të Holandës, Parlamenti ka mandatin që t’i japë udhëzime qeverisë për zhvillimin e politikës së jashtme. Për shembull, kur Holanda bllokoi hapjen e negociatave me Shqipërinë, nisma erdhi nga parlamenti.

Rezoluta e Parlamentit holandez kërkon pezullimin e regjimit pa viza për Serbinë përmes mekanizmit të frenimit emergjent deri në mars të vitit 2023, “duke pasur parasysh se Serbia po minon gjithnjë e më shumë politikën e jashtme të BE-së për shkak të qëndrimit të saj dashamirës ndaj Rusisë dhe jo- pajtueshmërinë me sanksionet e BE-së,” por edhe mos harmonizimin e regjimit të vizave, prandaj gjatë vitit 2022 një numër i madh i migrantëve të parregullt kaluan në BE nga Serbia.

Sipas Traktatit të Lisbonës, në Bashkimin Evropian ekzistojnë dy lloje të kësaj procedure. Njëra që lidhet me Politikën e Përbashkët të Jashtme dhe të Sigurisë dhe tjetra që zbatohet në fusha të tjera, si bashkëpunimi në luftën kundër krimit dhe sigurimet shoqërore.