SHBA garanton: Nuk lejojmë Republika Srpska

Ambasadori amerikan në Prishtinë, Jeffrey Hovenier, tha se Shtetet e Bashkuara presin, si nga Kosova, ashtu edhe nga Serbia, që te zbatojnë të gjitha detyrimet dhe angazhimet e ndërmarra me Marrëveshjen e Ohrit për normalizimin e marrëdhënieve.

Sipas tij, Kosova duhet të fillojë ta çojë përpara Asociacionin e komunave me shumicë serbe dhe “ky duhet të jetë ndër hapat e parë”.

Hovenier shtoi se Serbia duket se ka vizion tjetër, por kjo, sipas tij, “nuk do të thotë se Kosova nuk mund ta çojë përpara një asociacion që i adreson shqetësimet e komunitetit serb në Kosovë”.

Ai shfaqi shpresën se kryeministri i Kosovës, Albin Kurti, do të punojë me përfaqësuesit e Bashkimit Evropian drejt këtij “qëllimi strategjik” dhe theksoi qe “Nëse nuk e bën këtë, do të ketë pasoja”

Ambasadori amerikan u shpres se SHBA beson se asociacioni duhet të jetë krejtësisht në përputhje me Kushtetutën aktuale të Kosovës dhe të jetë krejtësisht në përputhje me vendimin e Gjykatës Kushtetuese të vitit 2016.

I pyetur se çfarë ndodh nëse Serbia nuk e pranon një gjë të tillë dhe kërkon më shumë, Jeffrey Hovenier theksoi se Serbia mund të kërkojë më shumë, por në fund të ditës kjo është ajo që SHBA-ja dhe komuniteti ndërkombëtar janë të gatshëm të shohin si të pranueshme.

“SHBA-ja “nuk lejon” një Asociacion si Republika Sërpska” – deklaroi ambasadori amerikan, I cili duke iu pergjigjur pyetjes tjeter se “Cilat janë garancitë se Asociacioni në një pikë nuk do të përfundojë sikurse një Republika Sërpska’, u shpreh: Besoj se duhet të ketë një lloj besimi te Amerika  dhe në zotimet që ne kemi bërë se ne nuk do të lejojmë që kjo të ndodhë. Ne jemi pajtuar që të mos ndodhë dhe jemi serioz për këtë.