Shërbimi Sekret Amerikan qëllon një person të armatosur pranë Shtëpisë së Bardhë

Një incident i rëndë ka ndodhur pak pas mesnatës të së dielës, pranë Shtëpisë së Bardhë, ku një person është qëlluar nga Shërbimi Sekret amerikan gjatë një përplasjeje të armatosur. Sipas raportimeve, ngjarja është e lidhur me një person që dyshohej se mund të kishte udhëtuar nga Indiana drejt Uashington DC dhe mund të ishte i rrezikshëm.

Policia lokale kishte njoftuar agjencinë për një “individ vetëvrasës” dhe, pas informacioneve të marra, forcat e rendit janë dërguar për të hetuar situatën. Kur oficerët u afruan pranë individit, ata panë që ky person mbante një armë zjarri, çka çoi në një konfrontim të armatosur. Në këtë përplasje, ai është qëlluar nga Shërbimi Sekret, si pasojë e kërcënimit të mundshëm që paraqiste.

Sipas një deklarate të postuar në X nga zëdhënësi i Shërbimit Sekret, Anthony Guiglielmi, thuhet se, “Ndërsa oficerët u afruan, personi mbante një armë, dhe për shkak të kërcënimit të mundshëm, ka ndodhur një konfrontim gjatë të cilit ai u qëllua.”

Fatmirësisht, asnjë nga oficerët e përfshirë në incident nuk ka pësuar dëmtime, ndërsa individi i përfshirë në përplasje është plagosur dhe është transportuar menjëherë në spital për trajtim mjekësor. Aktualisht, gjendja e tij shëndetësore ende nuk është bërë publike, dhe hetimet për ngjarjen vazhdojnë.

Incidenti tregon masat e rrepta të sigurisë që merren nga Shërbimi Sekret për të parandaluar situata të rrezikshme dhe për të mbrojtur jetën e qytetarëve dhe të personelit.