Shpallja e dy organizatave si terroriste/ Lista serbe: Provokim nga Kurti

Lista Serbe, partia me e madhe serbe të Kosovës, kritikoi të premten vendimin e qeverisë në Prishtinë për shpalljen e dy entitete serbe si organizata terroriste, veprim që sipas tyre ka për qëllim përshkallëzimin e situatës në veri të Kosovës.

Lista Serbe tha se këto organizata janë joekzistente duke theksuar se “Brigada e Veriut” është një organizatë virtuale që ekziston siç u tha vetëm në kokën e kryeministrit Albin Kurti, ndërkaq “Mbrojtja Civile” ka shumë vite që është integruar në institucionet e Kosovës.

“Me synim të parandalojmë regjimin e Kurtit të bëjë provokime të reja dhe t’i akuzojë serbët apo ndonjë organizatë të re virtuale për to, duke i dhënë vetes arsyetim për përndjekjen dhe frikësimin e serbëve, kërkojmë nga KFOR-i dhe EULEX-i që urgjentisht të vendosin forcat e tyre në të gjitha pikat në veri”, thuhet në reagim.