Shpërndanin drogë në lokalet e natës, 5 të arrestuar në Tiranë

Një hetim i nisur që prej dhjetorit të vitit të shkuar ka vënë në pranga këtë të mërkurë (14 qershor), 5 persona në Tiranë për shpërndarje droge në lokalet e natës. Bëhet fjalë për Ledjo Gashin, Ergi Saliun, Brajan Lalën, Erges Nexhipin dhe Mario Denën, të cilët dyshohet se shisnin kokainë në lokale nate. Gjithashtu në saj të këtij operacioni është shpallur në kërkim një 34-vjeçar. Të arrestuarve iu gjet mbi 1 kg kokainë, e cila u sekuestrua nga uniformat blu. Emri i operacionit “Moncler” erdhi pasi në pakon e gjetur me kokainë ishte printuar logo e kompanisë së famshme. Policia ka sekuestruar 3 automjete, 1 kg kokainë, 710 euro, 149 mijë lekë dhe 9 celularë. “Blutë” e Tiranës arritën t’i lokalizonin 5 të rinjtë në rrugën dytësore Tiranë-Durrës, në afërsi të fshatit Marikaj. Gjatë kontrollit të një prej automjeteve të të arrestuarve u gjet një pako kokainë me peshë 1 kg e 100 gr. Materialet proceduale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.