Shqipëria 2030/ Cilat shtete janë pro dhe kundër për anëtarësimin e vendit tonë në BE

Sondazhi i Eurobarometrit për zgjerimin me shtetet ballkanike ka zbuluar faktin se pro anëtarësimit të Shqipërisë në familjen evropiane deri në vitin 2030 janë në total 45% e shtetasve të BE-së të pyetur, ndërsa 44% janë shprehur kundër.

Shifra mbi 50% e mbështetjes për shqiptarët është regjistruar në 12 shtete anëtare të BE-së, ndërsa nën 50% ka rezultuar në 15 shtetet e tjera.

Mbështetjen më të madhe shqiptarët e kanë marrë nga shtetasit e Suedisë me 74%, të Danimarkës me 60% dhe ata të Holandës me 59%, pasuar nga kroatët me 58%, maltezët me 57%, spanjollët me 55% dhe finlandezët me 53%.

Në dallim nga mbështetja e lartë që kemi marrë në këtë sondazh nga shtetet skandinave, bie në sy fakti se vetëm 39% e grekëve janë pro, ndërsa një shifër e ulët prej 48 përqind është regjistruar mes italianëve të pyetur nëse e duan Shqipërinë në BE në vitin 2030.

58% e qytetarëve në Kroaci shprehen pro anëtarësimit të Shqipërisë në BE dhe vetëm 36% kundër.
Në Slloveni, 52% janë pro dhe 43% kundër.
Në Spanjë, 55% e të anketuarve janë pro anëtarësimit të Shqipërisë dhe 26% kundër.
Në Portugali, 53% pro dhe 31% kundër, ndërsa në Maltë 57% pro, 31% kundër.

Shtetasit e Rumanisë janë 51% pro Shqipërisë në BE në vitin 2030, ndërsa 39% kundër.
Në Hungari, 49% pro dhe 44% kundër, ndërsa në Poloni 47% pro, 43% kundër.

Shteti me mbështetjen më të ulët për Shqipërinë në BE në vitin 2030 është Republika Çeke, ku 62% e të anketuarve janë kundër dhe vetëm 29% e tyre janë shprehur pro, pasuar nga Austria, ku 30% janë shprehur pro dhe 64% kundër.

Vetëm 35 përqind e gjermanëve na shohin në BE në vitin 2030, ndërsa shifër e ulët 36 përqind është regjistruar në Francë.

Ky sondazh u zhvillua në muajt shkurt-mars të vitit 2025 me pjesëmarrjen e 26 mijë e 300 qytetarëve.