Shqipëria dënon sulmin me raketa iraniane ndaj Qatar-it: Një shkelje e rëndë e sovranitetit

Shqipëria i është bashkuar bashkësisë ndërkombëtare në dënimin e asaj që e ka quajtur një “shkelje e rëndë” të së drejtës ndërkombëtare dhe sovranitetit pas sulmit të fundit me raketa të Iranit në territorin e Qatar-it.

Sulmi, i cili kishte në shënjestër Bazën Ajrore Al Udeid, solli dhe reagimin e Tiranës zyrtare, ku autoritetet shprehën mbështetje të palëkundur për integritetin territorial dhe sigurinë kombëtare të Qatar-it.

Në një deklaratë zyrtare drejtuar udhëheqjes së Qatar-it, qeveria e Shqipërisë dhe Ministria për Evropën dhe Punët e Jashtme përcolli dënimin e saj më të fortë të sulmit, duke theksuar se akte të tilla agresioni kërcënojnë jo vetëm Shtetin e Qatar-it, por edhe paqen dhe stabilitetin më të gjerë të rajonit.

“Ky akt agresioni përbën një shkelje të rëndë të sovranitetit, hapësirës ajrore dhe së drejtës ndërkombëtare të Qatar-it”, thuhet në deklaratë, duke shtuar se Shqipëria përgëzon autoritetet e Qatar-it për reagimin e tyre të shpejtë dhe efektiv, i cili ndihmoi në parandalimin e viktimave dhe përshkallëzimit të mëtejshëm.

Shqipëria riafirmoi solidaritetin e saj të vendosur me Qatar-in në këtë moment kritik dhe u bëri jehonë thirrjeve ndërkombëtare për të gjitha palët e përfshira që të tregojnë përmbajtje dhe të angazhohen në dialog paqësor.

Deklarata përfundoi duke nënvizuar angazhimin e vazhdueshëm të Shqipërisë për të mbështetur paqen, sigurinë dhe zgjidhjet diplomatike në rajon.

Sipas të përditshmes amerikane New York Times, Irani e koordinoi sulmin me raketa të së hënës në Bazën Ajrore Al Udeid me zyrtarët e Qatar-it dhe dha njoftim paraprak se sulmet po vinin për të minimizuar viktimat, sipas tre zyrtarëve iranianë.

Zyrtarët thanë për NYT-në se Irani simbolikisht duhej të kundërsulmonte SHBA-të, por në të njëjtën kohë ta kryente atë në një mënyrë që t’u lejonte të gjitha palëve një rrugë daljeje.

Ata e përshkruan atë si një strategji të ngjashme me vitin 2020, kur Irani i dha Irakut paralajmërime përpara se të qëllonte me raketa balistike Bazën Ajrore Al-Asad në Irak, pas vrasjes së gjeneralit iranian Qasem Soleimani nga presidenti amerikan Donald Trump.