Shqipëria në BE/ The Economist: Rama i mençur, po le të kuptohet se ka dhe alternativa të tjera

The Economist

Për Edi Ramën, këto janë njëkohësisht ditët më të mira dhe më të këqija – por kryesisht më të mirat. Në maj, kryeministri i Shqipërisë u rizgjodh për një mandat të katërt radhazi. Që nga ardhja e tij në pushtet në vitin 2013, Prodhimi i Brendshëm Bruto i vendit është rritur me 160 për qind në euro.

Lufta në Ukrainë ka përshpejtuar përpjekjen e hershme dhe të zvarritur të Shqipërisë për t’u anëtarësuar në Bashkimin Evropian, së bashku me Ukrainën dhe kandidatë të tjerë. Zyrtarë evropianë thonë se negociatat mund të përfundojnë që në vitin 2027 dhe se Shqipëria mund të anëtarësohet deri në vitin 2030.

Në të njëjtën kohë, popullsia e Shqipërisë është tkurrur nga 2.9 milionë në 2.4 milionë gjatë qeverisjes së Ramës. Korrupsioni mbetet i përhapur dhe SPAK-u, struktura e pavarur kundër korrupsionit, ka ngritur akuza ndaj disa prej aleatëve të tij më të afërt.

Një ish-protegé i tij, kryetari i Bashkisë së Tiranës, po e drejton qytetin nga qelia e burgut. Po ashtu, ka akuza se partia në pushtet ka përdorur gjoba dhe presion administrativ për të ndikuar votën në zgjedhjet e majit.

“Budallallëk”, përgjigjet Rama.

Kryeministri shtatlartë, i veshur me një bluzë të zezë, një xhaketë të gjatë moderne dhe disa byzylykë të kuq, po pi një ekspres në një hotel në Vjenë, ku është ftuar të flasë në një konferencë ndërkombëtare.

Asnjë lider shqiptar më parë nuk ka qenë kaq i njohur jashtë vendit.

Rama flet ngrohtësisht për “Viktorin” (Orbán), kryeministrin e djathtë hungarez, dhe mban marrëdhënie të mira me liderë të majtë si Pedro Sánchez i Spanjës dhe Mette Frederiksen e Danimarkës.

Ai ka bashkëpunuar edhe me Giorgia Meloni-n, kryeministren populiste të djathtë të Italisë, për planin e saj tashmë të ngrirë për dërgimin e azilkërkuesve në kampe në Shqipëri.

Më 13 nëntor në Romë, dy qeveritë nënshkruan 16 marrëveshje në fusha që shkojnë nga energjia te siguria.

Megjithatë, Rama është i irrituar. Së fundmi, SPAK-u ngriti akuza ndaj zëvendës kryeministres Belinda Balluku për dyshime mbi manipulimin e një tenderi infrastrukture. Ajo i mohon akuzat. Rama thotë se nuk e di nëse ajo është fajtore, por e quan të paprecedentë vendimin e gjykatës për ta pezulluar nga detyra: “Kjo nuk ka ndodhur kurrë në historinë e Evropës!”

Pasi SPAK-u arrestoi kryetarin e Bashkisë së Tiranës për korrupsion (akuza që ai i mohon), Rama u përpoq ta shkarkonte nga posti.

Gjykatat e ndaluan këtë, duke e detyruar kryebashkiakun të drejtojë qytetin nga burgu. Rama e quan këtë absurde. Ai e përshkruan institucionin antikorrupsion si “të papërvojë, ndonjëherë tepër agresiv dhe ndonjëherë thjesht të gabuar. Por është pjesë e procesit”, shton ai.

Shqipëria, sipas Ramës, po ndërton një drejtësi të pavarur. Nëse aleatët e tij presin të shpëtohen, gabohen: “Nuk jam i martuar me ta”.

Një arsye për këtë angazhim të deklaruar ndaj shtetit ligjor është joshja e anëtarësimit në BE.

Por kjo kërkon miratimin e të 27 vendeve anëtare. Disa skeptikë dyshojnë në kredencialet e Shqipërisë për qeverisje të pastër.

Ndërkohë, shumë forca të djathta populiste kundërshtojnë pranimin e vendit që do të ishte shteti i parë me shumicë myslimane në BE, për arsye nativiste.

Marrëdhëniet e mira me Orbán-in dhe Meloni-n mund të mos mjaftojnë. Rama thotë se po përpiqet të afrohet edhe me drejtuesit e së djathtës populiste franceze, por ajo mbetet kategorikisht kundër zgjerimit.

Rama shprehet se do të ishte i gatshëm të hiqte dorë përkohësisht nga e drejta e vetos në BE dhe nga posti i komisionerit evropian për Shqipërinë, nëse kjo do të ndihmonte për të bindur skeptikët.

Ndërkohë, ai po ndërton ura të tjera. Jared Kushner, dhëndri i Donald Trumpit, ka marrë leje për të ndërtuar një resort bregdetar në Shqipëri.

Rama po ashtu po afrohet me vendet e Gjirit. “Lidhja e tyre me kulturën është mahnitëse”, thotë ai. “Ajo që bëri Firence për Evropën në Rilindje, ata po e bëjnë sot për botën”.

Kur përpiqesh të hysh në një klub, është e mençur të lësh të kuptohet se ke edhe alternativa.