Si Pilati…/ Berisha e pranon më në fund por lan duart

Financimi rus 500 mijë dollarë për Partinë Demokratike, ka hapur një luftë të re mes Sali Berishës dhe Lulzim Bashës. Edhe pse Berisha e ka marrë gjithmonë në mbrojtje ish-kryetarin e partisë për këtë çështje para se ai ta përjashtonte nga grupi pas shpalljes ‘non grata’, Berisha ka dalë sot në një konferencë për mediat duke ‘larë duart’ nga kjo akuzë shumë e fortë që rëndon mbi partinë më të madhe opozitare në vendi. Berisha ka thënë se Basha është fajtor i madh dhe prej kësaj dosjeje ka qenë gjithmonë peng.

Berisha tha se për dosjen fillimisht e kishte njoftuar në vitin 2018, ambasadori amerikan Donald Lu i kishte i kishte dhënë përpara dosjen me shkrimin e portalit Mother Jones. Ish-Kryeministri tha se fillimisht kishte besuar Bashën.

“Në dosje, përveç artikullit të revistës dhe një flete se Nick Muzin ishte i regjistruar si lobist i Bashës, nk kishte asnjë dokument tjetër. Lulzim Basha, i pyetur nga unë, më deklaroi se paratë e paguara për Nick Muzin, janë para të mbledhura në përputhje me rregullat në diasporën shqiptare në SHBA dhe se artikulli nuk ka asgjë të vërtetë. Midis artikullit të gazetës dhe shpjegimit të Bashës, unë kam besuar variantin e këtij të fundit”, tha Berisha.“Më vonë jam vënë në dijeni të faktit se Basha mbahej peng me dosjen Muzin, dhe se çështja ndaj tij u mbyll në gjykatë me ndërhyrje të Agaçit, ku prokurori duke shkelur ligjin, nuk bëri rekurs në Gjykatën e Lartë, në kundërshtim flagrant me ligjin. Këtë e kam denoncuar si akt nga foltorja në foltore”, ka vijuar ish-Kryeministri.

Gjithashtu ai tha se më pas është informuar se Basha e kishte mashtruar dhe nuk kishte bërë mbledhje fondesh në diasporë.

“Pas këtyre informacioneve, burimi i parave mund të ishte rus, siç thoshte revista. Bazuar në këto informacione, më 4 prill të vitit 2022, kam denoncuar para jush financimin rus të Lulzim Bashës dhe mbylljen e dosjes nga Edi Rama”, tha Berisha.

Sipas tij rikthimi i kësaj çështje, provon atë që ai vetë ka denoncuar disa herë, provon se Basha është mbajtur peng me këtë dosje dhe duhet të japë përgjigje për origjinën e këtyre parave.

“Nga informacionet paraprake që kam, nga fondet që Biniatta ka dorëzuar te Nick Muzin, nuk kanë kaluar asnjë prej tyre nga arka e PD-së dhe fondet e PD-së. Për këtë arsye, përgjegjësia nuk është e PD, por është individuale e Lulzim Bashës dhe atyre që janë përfshirë në këto sanksione. Duke u distancuar nga kjo aferë kryekëput e ish-kryetarit të PD, dhe duke u zotuar se do të ngrejë një komision auditi për të bërë transparencën e plotë, kërkojmë hapjen e një hetimi të plotë për të larguar çdo dyshim që lidh PD-në me dosjen ruse”, tha Berisha.

I pyetur nga gazetarët se kur është informuar për faktin që Basha e ka mashtruar siç pretendon ai, ndërkohë që më parë e ka mbështetur me pasion duke thënë se ‘gjithçka janë shpife’, Berisha tha se në fillim të këtij viti ia kanë thënë disa emigrantë shqiptarë nga diaspora.