Situatë e tensionuar në Veri të Kosovës, dëgjohen të shtëna armësh

Serbët duket se kanë një plan për ta tensionuar situatën në Veri të vendit, në përpjekje për ta penguar punën e kryetarëve të rinj të komunave. Alarmi është ndezur, e qytetarët kanë filluar të mblidhen para kuvendeve komunale në katër komunat me shumicë serbe. Burime të Express thonë se autobusët që ishin nisur për të marrë pjesë në mitingun e Vuçiqit në Beograd që mbahet sonte, kanë marrë urdhër që të kthehen. A po përgatitet skenari i kohë pas kohshëm serb atje; vendosja e barrikadave?

Serbët e Veriut kanë ndezur alarmet në pjesën Veriore të Mitrovicës, që ndryshe është thirrje për banorët që të mblidhen. Këto janë informatat e para nga pjesa problematike e vendit.

Duke reaguar pas betimit të Kryetarit të Mitrovicë së Veriut Erden Atiq, Lista Srpska, partia më e madhe e serbëve në Kosovë, pa ofruar prova, ka paralajmëruar  serbët nga 1 qershori, “do ta mbrojnë veten me të gjitha mjetet” për të ndalur represionin.

Mediat lokale atje, shkruajnë se janë mbledhur tashmë qytetarët para kuvendeve komunale. Kjo ndodh disa ditë pasi që të paktën dy nga katër kryetarët e komunave më shumicë serbe dhanë betimin; bëhet fjalë për kryetarë joserbë, që dolën nga zgjedhjet të cilat serbët i bojkotuan.

Burime të Gazetës Express thonë se Aleksandër Filipoviq është parë para objektit të komunës së Leposviqit. Të njëjtat burime nga sektori i sigurisë së Kosovës, thonë se Filipoviq dyshohet se udhëheq pjesëtarët serbë të Policisë së Kosovës që tashmë kanë dhënë dorëheqje nga ky insitutucion.

“Ekzistojnë dyshime se serbët po përgatiten për të vendosur barrikada të reja në Veriun e Kosovës”, tha për Express një burim nga sektori i sigurisë.

Policia e Kosovës, para pak çastesh, ka treguar se cfarë po ndodh atje.

““Policia e Kosovës (PK), sipas autorizimeve ligjore dhe kushtetuese po ndërmerr veprimet e saja policore në ofrimin e sigurisë, ruajtjen e rendit dhe sigurisë publike si dhe ndërmarrjen e masave policore me qëllim të parandalimit të të gjitha veprimtarive kriminale që paraqiten në vend. Sipas detyrës zyrtare, sot Policia e Kosovës është duke asistuar kryetarët e komunave veriore Zveçan, Leposaviq dhe Zubin Potok,  për të ushtruar të drejtën e tyre në punë, në objektet zyrtare të komunave përkatëse”, thuhet në njoftim të policisë.

Ndryshe, Vucic sonte në Beograd pritet ta mbaj një miting, në fakt një anti-miting ndaj mitingjeve masive të Opozitës së atjeshme. Ishte paralajmëruar se dhjetëra autobus nga Kosova do të shkojnë atje në përkrahje të Presidentit serb. Por, burime të Express thonë se tashmë të njëjtit janë urdhëruar që të rrijnë në Kosovë; si duket për t’i përdorur të njëjtit për lojërat e tij në Kosovë.

Hidhet gaz lotsjellës para objektit komunal së Zveçanit

Është hedhur gaz lotsjellës para komunës së Zveçanit, ku një turmë qytetarësh po konfrontohet me Policinë.

Radio Evropa e Lirë raporton se Policia ka hedhur gaz lotsjellës dhe shok bomba për t’i shpërndarë qytetarët e tubuar para objektit komunal.

Në pamje shihet se si turma nis të shpërndahet, ndërkaq dëgjohet edhe një zhurmë e të shtënave. Nuk raportet se ka ndonjë të lënduar.

Sot në veri të vendit janë dëgjuar sirenat e më pas qytetarë të komunitetit serb janë tubuar.

Policia njoftoi kryetarët e rinj të komunave veriore: Zveçan, Leposaviq dhe Zubin Potok, për të hyrë në objektet zyrtare të komunave përkatëse. Udhëheqësit e këtyre komunave me shumicë serbe – që të gjithë shqiptarë – u betuan një ditë më herët në ndërtesa publike, si shkollat, për shkaqe të sigurisë.

Të shtëna me armë para Komunës së Zveçanit të bllokuar nga serbët

Para objektit të Komunës së Zveçanit, që është bllokuar nga serbë, janë dëgjuar të shtëna me armë para pak minutash, raporton Express.

Pas të shtënave, disa qytetarë kanë filluar të largohen prej aty, derisa në pamjet e publikuara dëgjohen edhe bërtima.

Nga Policia e Kosovës ende s’ka ndonjë konfirmim për këtë rast. Pak më herët, Policia tha se është duke asistuar kryetarët e komunave veriore Zveçan, Leposaviq dhe Zubin Potok,  për të ushtruar të drejtën e tyre në punë, në objektet zyrtare të komunave përkatëse, raporton Express.

“Policia e Kosovës (PK), sipas autorizimeve ligjore dhe kushtetuese po ndërmerr veprimet e saja policore në ofrimin e sigurisë, ruajtjen e rendit dhe sigurisë publike si dhe ndërmarrjen e masave policore me qëllim të parandalimit të të gjitha veprimtarive kriminale që paraqiten në vend. Sipas detyrës zyrtare, sot Policia e Kosovës është duke asistuar kryetarët e komunave veriore Zveçan, Leposaviq dhe Zubin Potok,  për të ushtruar të drejtën e tyre në punë, në objektet zyrtare të komunave përkatëse”, thuhet në njoftim.

I vihet flaka veturës së Policisë së Kosovës në Veri

Tensionet po vazhdojnë në veri të vendit. Një veturë e policisë është përfshirë nga flakët janë hedhur edhe shok-bomba.

Policia e Kosovës përdori edhe gaz lotsjellës për t’i shpërndarë qytetarët e tubuar para objektit komunal në Zveçan – komunë e banuar me shumicë serbe në pjesën veriore të vendit.

Paraprakisht, policia njoftoi se po asistonte kryetarët e rinj të komunave veriore: Zveçan, Leposaviq dhe Zubin Potok, për të hyrë në objektet zyrtare të komunave përkatëse.

Udhëheqësit e këtyre komunave me shumicë serbe – që të gjithë shqiptarë – u betuan një ditë më herët në ndërtesa publike, si shkollat, për shkaqe të sigurisë.