Situatë kaotike në Lezhë/ Uji i përmbytjeve del nga tualeti (PAMJET)

Një situatë kaotike po ndodh mbrëmjen e sotme në Lezhë, ku banorët raportojnë përmbytje brenda ambienteve të tyre si pasojë e kanalizimeve të pa mirëmbajtura. Sipas denoncimit të ardhur në redaksi, uji ka hyrë nga tualetet dhe ka mbushur godinën, duke rrezikuar dëmtimin e çdo pajisjeje e prone në brendësi.

Banorët shprehen se kanë telefonuar disa herë zjarrfikësen, por numri rezulton i fikur. Për të kërkuar ndihmë, ata janë detyruar të kontaktojnë policinë me shpresën që t’u dërgohej zjarrfikësja, por edhe aty nuk kanë marrë asnjë zgjidhje konkrete, përveç përgjigjeve të vakëta.

“Na ka mbushur vendi brenda ujë nga kanalizimet e pa rregulluara. Çdo gjë në studio është në rrezik të prishet. Kemi telefonuar zjarrfikësen disa herë, por e kanë të mbyllur. Edhe policia nuk na jep asnjë përgjigje. Situata po ndodh tani pas shkollës ‘Gjergj Fishta’ në Lezhë”, – tha një prej banorëve të shqetësuar.

Mësohet se është bërë edhe tentativë për të telefonuar ambulancën disa herë, por as aty nuk ka pasur përgjigje. Banorët ndihen të braktisur dhe të lënë në mëshirë të fatit, ndërsa situata brenda ambienteve vazhdon të përkeqësohet nga minuta në minutë.