S’ka bashkim me Shqipërinë/ Kurti: I gjithë faji i…Kushtetutës

Kryeministri i Kosovës, Albin Kurti në intervistën e dhënë për gazetën greke “To Vima” është pyetur edhe nëse e përkrahë bashkimin e Kosovës me Shqipërinë.

Kurti ka thënë se Kosova e Shqipëria janë një komb e dy shtete dhe ka shtuar se pushtetin në shkurt të vitit 2021 e ka fituar duke premtuar punë e drejtësi, dhe se këto mbeten prioriteti i tij si kryeministër.

“Ne kemi marrëdhënie të shkëlqyera me Shqipërinë. Mendoj se shumica e akuzave ndaj meje, në lidhje me bashkimin, vijnë nga serbët, sepse ata duan që Republika Srpska (Bosnja) të bashkohet me Serbinë. Ata kanë shpikur të ashtuquajturën ‘Bota Serbe’ si një eufemizëm për Serbinë e Madhe” – ka deklaruar Kurti

Në insistimin e gazetës greke, nëse dëshiron bashkim me Shqipërinë ose jo, ai ka thënë se për momentin Kushtetuta e Kosovës nuk e lejon një gjë të tillë dhe se Qeveria e Kosovës është e fokusuar në mbrojtjen e vendit, integritetit territorial dhe sovranitetit.