SKEMA/ Policia kap shpërndarësit, klientët u shkonin tek lagjia

Zbulohet skema e trafikut të lëndëve narkotike në Tiranë. Dy grupe kriminale, nga të cilat kanë rënë në pranga 20 persona dhe janë shpallur në kërkim 4 të tjerë, furnizoheshin me lëndë narkotike nga persona të paidentifikuar. Sipas dosjes së publikuar nga ReportTv, shpërndarësit pasi furnizohen nga persona të paidentifikuar me të cilët bashkëpunojnë me lëndë narkotike të llojit kokainë, heroinë dhe kanabis, i ndajnë dhe ambalazhojnë në doza të volga dhe i shesin me pakicë tek përdoruesit.

“Për ndarjen e lëndës narkotike në doza, përdorin kryesisht banesat e tyre, aty ku dyshohet se mbajnë sasitë e lëndave narkotike dhe një pjesë të parave të fituara. Porositë për lëndë narkotike i merrnin duke komunikuar fizikisht me porositësit ose përmes telefonit. Zakonisht i telefonojnë porositësit e njohur prej tyre, por u përgjigjen edhe personave të panjohur, të cilët u prezantohen si lidhje shoqërore. Ndërkohë si vend takimi me porositësit lënë kryesisht vende afër banesave të tyre por sipas rastit shkojnë edhe tek vendi ku ndodhen përdoruesit duke përdorur mjetet e tyre ose të marra me qera,”-shkruhet ndër të tjera në dosjen hetimore.

Në total gjatë operacionit “Harta” u sekuestruan 2 kilogramë e 120 gramë kokainë, 300 doza kanabis, 130 doza heroinë, shuma parash rreth 5 milionë lekë të vjetra, 1700 euro, 11 automjete dhe 29 aparate celulare.