S’mund ta tolerojmë më qasjen autokratike të Vuçiçit, thotë deputeti gjerman

Kryetari i Komisionit për Ballkanin Perëndimor në Bundestag-un gjerman, Josip Juratoviç, në një intervistë për gazetën malazeze “Pobjeda”, vlerësoi se Bashkimi Evropian duhet të rishqyrtojë negociatat me Serbinë për anëtarësim në unionin 27-shtetesh, pas parregullësive serioze të regjistruara në zgjedhjet e 17 dhjetorit 2024.

Juratoviç, duke komentuar shkeljen e normave demokratike dhe sundimit të ligjit në Serbi, të cilat janë përshpejtuar gradualisht prejse Partia Progresive Serbe është në pushtet, shtoi se sjellja autokratike e presidentit serb, Aleksandër Vuçiç, nuk duhet të tolerohet më nga bashkësia e organizuar ndërkombëtare, duke “ngrirë” negociatat e anëtarësimit.

“Në këtë situatë, në të cilën ai shpërfill parregullësitë në zgjedhje dhe shkel hapur rregullat e demokracisë, atëherë ne nuk mund ta tolerojmë më dhe nuk jam i vetëm në mendimin se negociatat e mëtjeshme të para anëtarësimit mes Serbisë dhe BE-së duhet të ‘ngrijnë’ derisa të fillohet me respektimin e parimeve bazë të vlerave të demokracisë. Ajo që ne mund të ndikojmë është se ata që duan të bashkëpunojnë me ne duhet të respektojnë rregullat e demokracisë, nëse duan të jenë partnerët tanë. Zgjedhjet në Serbi janë pika e fundit e tolerancës sonë ndaj qasjes autokratike gjithnjë e më të fortë të Vuçiçit ” – theksoi Kryetari i Komisionit për Ballkanin Perëndimor në Bundestag-un gjerman

Perspektiva e demokracisë në Serbi është ende e pasigurt. Gjithashtu, mbetet e paqartë nëse Serbia do të ndjekë politika të favorshme ndaj stabilitetit rajonal, pasi ajo gjatë gjithë historisë, ka marshuar sipas një daulleje krejt të ndryshme nga perëndimi, duke rreshtuar veten krah Rusisë dhe Kinës.