‘S’pështyj mbi veten time, s’e ndryshoj qëndrimin ndaj Kosovës as për postin e ministrit’

Kreu i Partisë Popullore Demokratike, njëherazi një nga liderët e koalicionit pro-rus “Për të Ardhmen e Malit të Zi” në Podgoricë, Milan Knezheviç, ka thënë se nuk do të lëvizë nga pozicioni përsa i përket mosnjohjes së pavarësisë së Kosovës, madje as për pozitën e ministrit në Qeverinë e Malit të Zi nën drejtimin e lëvizjes centrise “Evropa Tani”.

“Nuk jam dakord me asnjë riedukim ideologjik dhe lakim të shtyllës kurrizore kombëtare. Jam gati të vendos moratorium për të gjitha çështjet, por nuk jam gati të pështyj mbi veten time apo paraardhësit e mi për shkak të ndonjë funksioni. Në këtë drejtim, qëndrimi im për Kosovën si pjesë integrale e Serbisë nuk ka ndryshuar dhe as që mund ta ndryshojë askush” – ka deklaruar Knezheviç

Gjatë një seance në Kuvendin e Malit të Zi para disa ditëve, deputeti malazez ka thënë se më përpara do të largohej nga politika e të merrej me mbjelljen e domateve në një fshat të Zetës – komunë në Mal të Zi që synon çnjohjen e Kosovës, por asnjëherë nuk do të lëvizë nga qëndrimi refuzues ndaj pavarësisë së Kosovës dhe tërheqjes së njohjes nga Qeveria e Malit të Zi.

E përkundër përpjekjeve të deputetit malazez, nga Shtetet e Bashkuara të Amerikës dhe Bashkimi Evropian kanë thënë se presin me urgjencë që Mali i Zi të shpallë të mbyllur çështjen e njohjes së Kosovës, angazhimin e Malit të Zi në bllokun ushtarak të NATO-s dhe sanksionet e bashkësisë së orgnizuar ndërkombëtare ndaj Rusisë për agresionin ndaj Ukrainës.