Sulmet kundër Kurtit dirigjohen nga Tirana/ Bytyçi ‘zbërthen’ Haradinaj, përmend Batonin

“Teksa Kosova është në fushatë elektorale për zgjedhjet e përgjithshme, alternativat që partitë politike kanë shpalosur janë të ndryshme. Opozita po bën më shumë premtime elektorale sesa mazhoranca” – Kështu shprehet profesori Enver Bytyçi, i cili thotë se, fushatën po e bëjnë edhe për vendime, të cilat nuk varen nga politika ose institucionet e shtetit të Kosovës.

“P.sh RamushHaradinaj thotë se “për katër vjet do ta fuse Kosovën në NATO“! Se çfarë roli ka Ramushi ose ndonjë tjetër në këtë, nuk e di. Se çfarë formule do të ndiqet për ta realizuar këtë, së paku kreu i AAK-së nuk e ka shpjeguar.  Nga ana tjeter, LDK thotë se do të bëjë mrekulli ekonomike. Megjithatë qytetarët e Kosovës janë të dënuar ti dëgjojnë” – eshte shprehur Bytyci teksa edhe ka theksuar se Albin Kurti ka bërë fushatë dhjetë fish më tepër jashtë Kosovës sesa në Kosovë.

“Nuk e di nëse ka frikë se mos ia merr votuesit e diasporës opozita apo jo! Por e di se vota e diasporës është shumë e vlefshme për të. Në Kosovë Albin Kurti sapo ka nis fushatën elektorale. Dhe në nisje të saj ka kërkuar që 500 mijë shqiptarë ta votojnë. Këtë objektiv ka përcaktuar. Eshtë një pikëmbërritje e vështirë. Sepse gara nuk është dhe aq e lehtë. Opozitarët e tij nuk janë bashkuar formalisht kundër Kurtit. Por praktikisht ata duket se koordinohen për ta sulmuar atë. Eshtë ndërtuar një projekt informimi e dez-informimi. Me pak fjale, Albin Kurti është nën një sulm të paparë” – ka deklaruar Bytyci, sipas te cilit, akuzat ndaj Kurtit i dirigjon Tirana zyrtare.

“Fjalimi i Ramush Haradinajt në parlament ishte absolutisht së paku përpjekje për të kënaqur orekset e Edi Ramës. Kryeministri i Shqipërisë është në kontakt çdo ditë me krerët e opozitës në Kosovë dhe jep udhëzime se si dhe ku duhet ta godasin kryeministrin e Kosovës. Ndërkohë ju e keni vënë re se Baton Haxhiu këto kohë më shumë po qëndron në Kosovë sesa në Shqipëri.

Ai është transmetues i udhëzimeve të Edi Ramës te eksponentët e opozitës në Kosovë. Por shoh se Ramushi është më besnik edhe se Memli Krasniqi ndaj tij.

Pra, dua të them se gjithë kjo propagandë dhe hiperbolizim e gjërave të vogla synon ta dobësojë pozitën elektorale të Albin Kurtit. Mos harrojmë dhe provokimet propagandistike të Beogradit e deri të Moskës”, potencoi Bytyci

Sipas tij, në këto kushte kryeministri Kurti duhet të ndërtojë një strategji të përgënjeshtrimit të akuzave te pabaza, bazuar në të qenit i sinqertë dhe i vërtetë, për të pranuar se çfarë ka bërë gabim në këto katër vite.